П.МАНДАХ

УИХ-ын ээлжит бус чуулган өнөөдөр /2017.9.6./ 10:00 цагт эхлэх байсан ч Засгийн газрын гишүүд орж ирэлгүй байсаар цагаасаа хоёр цаг шахам хоцорч эхэлсэн. Энэ чуулганаар Ерөнхий сайдыг огцруулах эсэхийг хэлэлцэх ёстой байв. 
Ээлжит бус чуулганы хуралдааны эхэнд Ерөнхий сайд Ж.Эрдэнэбат “...Монгол Улсын Шадар сайд У.Хүрэлсүхийг намайг тагнаж чагнасан гэж буруутгаж байна. Засгийн газрыг огцруулах асуудлыг хэлэлцэхийн өмнө УИХ-ын Тусгай хяналтын дэд хороогоор энэ асуудлаар мэдээлэл сонсоё гэсэн санал гаргаж байна” гэсэн юм.
Түүний дараа МАН-ын бүлгийн дарга Д.Хаянхярваа “...Засгийн газрыг огцруулах асуудлыг хэлэлцэхийн өмнө УИХ-ын Тусгай хяналтын дэд хороогоор мэдээллийг сонсох нь зүйтэй. Энэ асуудлыг нэг талд нь шийдэж, тагнасан чагнасан гэж байгаа хоёр хүний хэн нь гэм буруутайг тогтоох ёстой. Буруутай этгээд нь хуулийн дагуу шалгагдаад явах хэрэгтэй. Тэгэхгүйгээр Засгийн газрын асуудлыг хэлэлцэх боломжгүй юм. Хуулийн байгууллагын шалгаж буй мөрдөн байцаалтын дотоод асуудалд оролцох гэж байгаа юм биш. Гэхдээ УИХ-ын Тусгай хяналтын дэд хороогоор энэ асуудлыг сонссоны дараа Засгийн газрын асуудлыг чуулганаар хэлэлцэх нь зүйтэй. Тиймээс МАН-ын бүлэг завсарлага авах хүсэлтэй байна” гэлээ.
Залгуулаад УИХ-ын дарга М.Энхболд Бүлгийн даргын саналыг хүлээн авч, тодорхойгүй хугацаагаар завсарлага өгөөд гарч одсон. 
Ийн хэлэлцэх асуудлаасаа тэс өөр зүйлээр завсарлага авсанд ялангуяа гарын үсэг зурсан гишүүд дургүйцлээ илэрхийлж байв.
Эдгээр гишүүд чуулганы хуралдааны дараа хуралджээ. Ингээд өнөөдөр 18:00 цагаас өмнө ээлжит бус чуулганаар Ерөнхий сайдын асуудлыг хэлэлцэхгүй бол гарын үсэг зурсан УИХ-ын гишүүдийн төлөөлөл болж нэр бүхий гишүүд УИХ-ын дарга М.Энхболдын өрөөний үүдэнд өлсгөлөн зарлахаар болсон байна.

Эх сурвалж: www.polit.mn