А.ХҮМҮҮНГУА

УИХ дахь АН-ын бүлгээс өнөөдөр /2017.9.6./ УИХ-ын дарга М.Энхболдод анхааруулга хүргүүлэв.
Уг анхааруулгад “... Улсын Их Хурал дахь Монгол Ардын Намын бүлгийн 30 гишүүн Монгол Улсын Үндсэн хуулийн 25 дугаар зүйлийн 1 дэх хэсгийн 6 дахь заалт, 43 дугаар зүйлийн 4 хэсэг, Монгол Улсын Их Хурлын тухай хуулийн 7 дугаар зүйлийн 1 дэхь хэсгийн 3 дахь заалт болон 12 дахь заалтыг үндэслэн Монгол Улсын Ерөнхий сайд Жаргалтулгын Эрдэнэбатыг огцруулах саналыг 2017 оны 8 дугаар сарын 23-ны өдөр албан ёсоор гаргасан.

         Монгол Улсын Үндсэн хуулийн 43 дугаар зүйлийн 4 дэхь хэсэг, Монгол Улсын Их Хурлын чуулгын дэгийн тухай хуулийн 38 дугаар зүйлийн 38.1, 38.2 дахь хэсгүүдэд заасны дагуу Улсын Их Хурлын чуулган хуралдаж Ж.Эрдэнэбатын тэргүүлсэн Засгийн газрыг огцруулах эсэх талаар шийдвэрлэх эцсийн хугацаа 2017 оны 9 дүгээр сарын 6-ны өдөр буюу өнөөдөр билээ.

Монгол Улсын Их Хурлын тухай хуулийн 16 дугаар зүйлийн 16.5 дахь хэсэгт заасны дагуу зөвхөн Улсын Их Хурлын даргын ээлжит бус чуулган хуралдуулах тухай захирамжид заасан асуудлыг чуулганы нэгдсэн хуралдаанаар хэлэлцэх хуультай. Гэтэл 2017 оны 9 дүгээр сарын 6-ны өдрийн Улсын Их Хурлын нэгдсэн чуулганы үед Улсын Их Хурал дахь Монгол Ардын Намын бүлгийн дарга Д.Хаянхярваа ээлжит бус чуулганаар хэлэлцэх асуудалтай холбоогүй асуудлаар завсарлага авахаар санал гаргасныг Улсын Их Хурлын дарга хууль зөрчин хүлээн авч тодорхойгүй хугацаагаар завсарлага өгсөн ноцтой үйлдэл гаргалаа.

         Хуульд заасны дагуу Улсын Их Хурлын ээлжит бус чуулган Улсын Их Хурлын нэр бүхий 30 гишүүний Засгын газрыг огцруулахаар гаргасан саналыг хэлэлцэх эцсийн хугацаа өнөөдөр буюу 2017 оны 9 дүгээр сарын 6-ны өдөр дуусгавар болно. Хэрэв Та хуулийн хугацаанд Засгын газрыг огцруулах эсэх асуудлыг хэлэлцэн шийдвэрлэж чадахгүйд хүрвэл Үндсэн хууль зөрчиж Үндсэн хуулийн цэцэд  маргаан үүсэх асуудал болохоос гадна Монгол Улсын Их Хурлын тухай хуулийн 10 дугаар зүйлийн 10.2.4 дэхь хэсэгт заасан үндэслэлээр Улсын Их Хурлын даргад хариуцлага тооцох нөхцөл үүсч болзошгүйг анхааруулж байна.

       Улсын Их Хурлын эрхэм дарга та Монгол Улсын Үндсэн хуулиа  дээдэлж Монгол Улсын Их Хурлын тухай, Монгол Улсын Их Хурлын чуулганы дэгийн тухай хуулийг хэрэгжүүлэн ажиллахыг шаардаж байна” гжээ.

Эх сурвалж: www.polit.mn