П.Мандах

Дур эзнээ голохгүй гэдэг. Бас мөрөөдөхөд мөнгө төлөхгүй ч гэдэг билээ.
Ирэх долоо хоногийн дундуур УИХ-ын ээлжит бус чуулган хуралдаж Ерөнхий сайд Ж.Эрдэнэбатыг огцруулах эсэхийг хэлэлцэнэ. МАН-ын 31 гишүүн гарын үсэг зурсан. Сү.Батболд нар тэднийг дэмжиж байгаагаа Бүлгийнхээ хурал дээр илэрхийлсэн байдаг. Түүн шиг бодолтой гишүүд нэлээд байгаа аж. Тиймээс МАН-ын бүлгийн хурлын дараа санал хураахад огцруулах санал өргөн баригсдын тал хоёр гишүүнээр илүү байсан байгаа юм.
Тэднээс урвалаа урвалаа гэхэд ээлжит бус чуулган дээр цөөнх болох магадлал харагдахгүй байгаа. Учир нь АН-ын бүлэг дэмжинэ гэдгээ илэрхийлсэн. Аягүйдвэл Б.Наранхүү хүртэл Ж.Эрдэнэбатыг огцруулна гэж гарын үсэг зурж магадгүй гэнэ.
Үүний зэрэгцээ Ж.Эрдэнэбатыг огцорвол Ерөнхий сайд болно гэдгээ нуухгүй байгаа сайд нарын тухай яригдаад эхэллээ.
Саяхан сайд нар цуглаад үзэл бодол, байр сууриа ярилцацгаажээ. Хууль зүй, дотоод хэргийн сайд С.Бямбацогт “...Би Ерөнхий сайдад зүтгэнэ” гэхэд ЗГХЭГ-ын дарга Ж.Мөнхбат “...Хэрвээ С.Бямбацогт ингэж байгаа бол би ч бас үзнэ. Би 2016 онд энэ албан тушаалаас татгалзсан хүн” гэжээ. Танхимынх нь сайд нарын хувьд энэ хоёрын хэнийг нь ч дэмжээгүй байна. Учир нь С.Бямбацогт энэ Засгийн газрыг унагасан концессын гэрээтэй нэр холбогдсон сайд нарын нэг. Харин Ж.Мөнхбатын талаар үнэн худал нь мэдэгдэхгүй юм их байдаг. Тэгээд ч нам дотроо аль аль нь дэмжлэг авч чадахгүй. Тэгэхээр Ерөнхий сайдтайгаа хамт “явж” таарах нээ” гэцгээж байгаа ажээ.
Харин энэ хоёр сайд тус тусдаа хэвлэлийн баг бүрдүүлж, дэмжлэг үзүүлэх улстөрчидтэй уулзаад эхэлсэн байна.

Эх сурвалж: www.polit.mn