Б.ДАМДИН УИХ дахь МАН-ынхан албан ёсоор хоёр хуваагдсан гэдэг үнэн болж таарав. Өчигдөр УИХ-ын намрын чуулганы нээлтийн дараа МАН-ын бүлэг хоёр тусдаа хуралджээ. Ж.Эрдэнэбатын Засгийн газрыг огцруулах гарын үсэг зурсан 30 гишүүн нэг талд, хамгаалж саналаа өгсөн 30 нь нөгөө талд хуралдсан байгаа юм. Ингээд МАН-ын хоёр бүлэг хуралдаж дууссаны дараа Ерөнхий сайдад нэр дэвшигч У.Хүрэлсүх төлөөллүүдийг нь хүлээн авч уулзсан байна. Гарын үсэг зурсан 30 гишүүн ч яахав, байр суурь нь тодорхой. У.Хүрэлсүхийн Засгийн газарт сайдаар ажиллах боломжтой хүмүүсийнхээ талаар ярилцсанаа дуулгажээ. Харин өмнөх Засгийн газрыг хамгаалж санал өгсөн М.Энхболд нарын гишүүд “...Засгийн газраа 50:50 хувиар байгуулахгүй бол чуулганд орохгүй. Ингэхээр чамайг батламжлахгүй гэсэн үг” гэжээ. Өөрөөр хэлбэл, М.Энхболд нар “...Шадар сайд тэргүүтэй 6-7 яамны сайдын албан тушаалыг бидэнд өг. Тэгэхгүй бол...” гэж тулгасан байгаа юм. Тэдэнд У.Хүрэлсүх тодорхой хариу өгөлгүй гаргасан гэх эх сурвалжийн мэдээлэл байна. Ингэхээр У.Хүрэлсүх Ерөнхий сайдаар батламжлуулж чадах уу үгүй юу, бас Засгийн газар нь цаашид тогтвортой оршин тогтнох эсэх нь У.Хүрэлсүхийн өөрийнх нь шийдвэрээс хамаарахаар болж байна. Эх сурвалж: "Зууны мэдээ" сонин