УИХ-ын гишүүн С.Цэнгүүн аравдугаар сарын 8-нд 2026 оны төсвийн тодотголтой холбоотой асуудлаар мэдээлэл хийхдээ Хархорум хотын Зөвлөлийн ажлын албанд 1.5 тэрбум төгрөг нэмж тусгасныг шүүмжилсэн юм. Түүний мэдэгдэлтэй холбогдуулан Хархорум хотын Зөвлөлийн нарийн бичгийн дарга Х.Оюунцэцэгээс тодруулахад, 1.5 тэрбум төгрөгийг шинээр нэмж төсөвлөөгүй гэдгийг тайлбарлав.

-Хархорум хотын Зөвлөлийн ажлын албанд 1.5 тэрбум төгрөг нэмж төсөвлөсөн гэх шүүмжлэл гарсан. Энэ талаар тайлбар өгөхгүй юу?

-Энэ  асуудал Зөвлөлийн ажлын албанд хамаарахгүй. Бид шинээр нэмж оруулж ирсэн зүйл огт байхгүй.

-Тэгвэл үлдсэн 1.5 орчим тэрбум төгрөгийг ямар ажилд зарцуулахаар төлөвлөсөн бэ?

 -Дэлхийн шилдэг зөвлөх үйлчилгээний компанитай хамтран ажиллах, супер компьютер авч хиймэл оюун ухаан ашиглаж эхлэх, Хархорум хотын дижитал ихрийг бүтээж турших, алдааг нь засах, цаашлаад барилга байгууламж барих бодлогыг хэрэгжүүлэхэд зарцуулахаар төлөвлөсөн.

-Хархорум хотын Зөвлөлийн ажлын алба ямар чиг үүрэгтэй ажилладаг вэ?

-Хотын Зөвлөл ажиллах нь хуулиар тогтоосон шаардлага. Зөвлөлийн ажлын алба нь Хархорум хотыг сэргээн байгуулах бодлогыг тодорхойлох, хотын захирагчийн үйл ажиллагаа болон хөрөнгө мөнгөний зарцуулалтад хяналт тавих үндсэн чиг үүрэгтэй.Хархорум хот өөрөө тэнгэрээс буугаад ирэхгүй. Хот байгуулах ажлыг бодлоготой, хяналттай байлгахын тулд бид бага зардлаар ажиллаж байна.

Эх сурвалж:www.polit.mn