Т.САЙХАН

Ерөнхийлөгч У.Хүрэлсүхийн урилгаар Монтенегро Улсын Ерөнхийлөгч Яков Милатович энэ сарын 08-10-ны өдрүүдэд Монгол Улсад төрийн айлчлал хийнэ.Энэ жил хоёр улсын хооронд дипломат харилцаа тогтоосны 20 жилийн ой тохиож байгаа бөгөөд Ерөнхийлөгч Я.Милатович төрийн тэргүүний түвшинд анх удаа айлчлах гэж байна.

Яков Милатович нь эдийн засагч мэргэжилтэй. 2023 оны тавдугаар сараас Монтенегрогийн Ерөнхийлөгчөөр ажиллаж байна. Тэрээр 1986 оны арванхоёрдугаар сарын 7-нд төрсөн.  2020–2022 онд Эдийн засгийн хөгжлийн сайд мөн Европын сэргээн босголт, хөгжлийн банк (EBRD)-нд Лондон болон Подгорицад эдийн засагчаар ажиллаж байсан. Иргэдийн амьжиргааг дээшлүүлэх, авлигатай тэмцэх, Монтенегрог Европын Холбоонд элсүүлэх гэсэн мөрийн хөтөлбөртэй ажилладаг.  Милатович нь 2006 онд Монтенегро тусгаар тогтнолоо сэргээн тогтоосноос хойших гурав дахь Ерөнхийлөгч бөгөөд тус улсын тусгаар тогтнолын үеийн хамгийн залуу Ерөнхийлөгч юм.

Манай улсад хийх айлчлалын хүрээнд хоёр улсын Ерөнхийлөгч албан ёсны хэлэлцээ хийж, худалдаа, эдийн засаг, хөрөнгө оруулалт, соёл, боловсрол, шинжлэх ухаан, уур амьсгалын өөрчлөлт, байгаль орчныг хамгаалах зэрэг чиглэлээр хамтран ажиллах талаар ярилцана. Төрийн тэргүүн нар албан ёсны хэлэлцээний үр дүнгийн талаар хэвлэл мэдээллийн байгууллагуудын төлөөлөлд мэдээлэл өгнө.Айлчлалын үеэр Хамтарсан тунхаглал болон харилцаа, хамтын ажиллагааг нийгэм, эдийн засаг, боловсрол, соёл, шинжлэх ухааны салбарт хөгжүүлэхтэй холбоотой баримт бичгүүдэд гарын үсэг зурна.Ерөнхийлөгч У.Хүрэлсүх НҮБ-ын Ерөнхий Ассамблейн 80 дугаар чуулганд оролцох үеэрээ Ерөнхийлөгч Яков Милатовичтой уулзаж байсан.Энэ үеэр дээд, өндөр түвшний айлчлал хийх, улс төр, эдийн засаг, аялал жуулчлал, боловсрол, соёлын салбар дахь хамтын ажиллагааг өргөжүүлэх талаар талаар санал солилцож, уур амьсгалын өөрчлөлт, цөлжилттэй тэмцэх зэрэг чиглэлээр олон улсын хамтын нийгэмлэгийн хүрээнд хамтран ажиллах сонирхлоо харилцан илэрхийлсэн юм.Монгол Улс, Монтенегро Улс 2006 оны 11 дүгээр сарын 30-ны өдөр дипломат харилцаа тогтоосон байна. Манай анхны сонин хэвлэл болох “Шинэ толь хэмээх бичиг”-ийн 1913 оны 3 дахь дугаарт Монтенегро Улсын газар нутаг, хүн ам, төрийн тогтолцоо болон онцлогийн талаар танилцуулсан байдаг юм.

Эх сурвалж:www.polit.mn