Б.Эрдэнэ

Уламжлалт анагаах ухааныг хөгжүүлэх төрийн бодлогын хүрээнд байгуулагдсан УАУЭСКТөв 35 жилийн хугацаанд тасралтгүй үйл ажиллагаагаа явуулж, иргэдэд эмнэлгийн тусламж, үйлчилгээ үзүүлж ирсэн байна.
Тус төвийн менежментийн хувьчлалтай холбоотой маргаан шүүхийн гурван шатны журмаар хянагдаж, 2015 онд Монгол Улсын Дээд шүүхийн шийдвэрээр эцэслэн шийдвэрлэгдсэн бөгөөд Нийслэлийн өмч хувьчлах комисст менежментийн гэрээний үр дүнд тулгуурлан хувьчлалыг дуусгавар болгох үүрэг хүлээлгэсэн байдаг.

Гэвч тус төвийн харьяа Хан-Уул дүүрэг, Зайсанд байдаг сувиллын байртай холбоотой асуудал сүүлийн үед анхаарал татаж байна. Тодруулбал, сувиллын байрнаас эмнэлгийн тоног төхөөрөмж, эд зүйлс, тэр дундаа эмч, ажилтнуудын хувийн эд зүйлсийг шөнийн цагаар зөөвөрлөж байгаа талаар мэдээлэл ирсэн байна. Үүнийг иргэд зураг авч баталгаажуулжээ. 

Одоогоор эдгээр эд хөрөнгийг хэн, ямар шийдвэр, зөвшөөрлийн үндсэн дээр, хаашаа зөөж байгаа нь тодорхойгүй байгаа аж. Ачиж зөөж буй эд зүйлсийн бүртгэл, өмчлөл, хадгалалт, шилжилт хөдөлгөөнд ямар хяналт тавьж байгаа нь ч мөн  тодорхой биш байна. 
УАУЭСКТ-ийн Менежментийн багаас уг асуудлаар эд хөрөнгө зөөж байгаа үйлдлийн хууль зүйн үндэслэл, холбогдох этгээдүүдийг тогтоох, ачиж зөөж буй тоног төхөөрөмж болон бусад эд хөрөнгийн бүртгэл, хадгалалт, шилжилт хөдөлгөөн, байгууллага болон ажилтнуудын эд хөрөнгө алдагдсан, үрэгдсэн, гэмтсэн эсэхийг шалгуулахаар цагдаагийн байгууллагад хандсан байна.