Киргизийн Ерөнхийлөгч Садыр Жапаров, Хятадын дарга Си Жиньпин нар янз бүрийн салбарын 32 хоёр талын баримт бичигт гарын үсэг зурсан гэж Гадаад хэргийн сайд Жээнбек Кулубаев  өнөөдөр /2026.8.31 /мэдээлсэн байна.

Тодруулбал, мөнхийн сайн хөрш, найрамдал, хамтын ажиллагааны тухай хэлэлцээр, мөн иж бүрэн стратегийн түншлэлийг хөгжүүлэх тухай тунхаглалд гарын үсэг зуржээ.  "Бид Хятадтай тогтоосон найрсаг харилцаагаа өндрөөр үнэлж, Киргизстан улс харилцан ашиг сонирхлын бүхий л салбарт цаашид нягт хамтран ажиллахад бэлэн байгаагаа баталж байна" гэдгийг Гадаад хэргийн сайд онцолжээ.

Дуучин Николь Шерзингер Дэлхийн нүүдэлчдийн наадмын нээлтэд дуулна

Киргизийн нийслэлд ШХАБ-ын дээд хэмжээний уулзалттай зэрэгцэн болж байгаа нэр арга хэмжээ бол Дэлхийн нүүдэлчдийн наадам. Наадмын нээлтийн ёслол өнөөдөр /2026.8.31/-д болох дээд хэмжээний уулзалтад ирсэн төр засгийн тэргүүнүүд хүндэт зочид нь байна.

Киргизийн тал Нүүдэлчдийн наадмын нээлтэд онцгой ач холбогдол өгч гадаадын нэртэй дуучин  уран бүтээлчдийг урьжээ. Тэдний нэг нь The Pussycat Dolls хамтлагийн экс гоцлол дуучин  Николь Шерзингер юм. Түүнийг Киргизийн “Манас” нисэх онгоцны буудал дээр  тус улсын Ерөнхийлөгчийн хэвлэлийн албаны дарга Дайырбек Орунбеков угтан авсан байна.  Тэрээр өнөөдөр Бишкек Арена цэнгэлдэх хүрээлэнд болох Дэлхийн нүүдэлчдийн наадмын нээлтийн тоглолтын гол уран бүтээлч байх аж.

"ШХАБ+" дээд хэмжээний уулзалтад оролцох удирдагчид хэн бэ?

ШХАБ-ын дээд хэмжээний уулзалтад 17 орны удирдагчид болон НҮБ-ын Ерөнхий нарийн бичгийн дарга оролцож байна. Оролцогчид олон улсын болон бүс нутгийн тулгамдсан асуудлууд, мөн байгууллагын цаашдын хөгжлийн тэргүүлэх чиглэлүүдийн талаар хэлэлцэх юм.

ШХАБ-ын дээд хэмжээний уулзалтын  зохион байгуулагч орон болох Киргиз улсын  Ерөнхийлөгчийн хэвлэлийн алба маргаа буюу есдүгээр сарын 1-нд болох ШХАБ болон "ШХАБ+" дээд хэмжээний уулзалтад оролцох удирдагчид болон бусад хүндэт төлөөлөгчдийн жагсаалтыг нийтэлжээ.  Үүнд:

Беларусийн Ерөнхийлөгч Александр Лукашенко;

Энэтхэгийн Ерөнхий сайд Нарендра Моди;

Ираны Ерөнхийлөгч Масуд Пезешкян;

Казахстаны Ерөнхийлөгч Касым-Жомарт Токаев;

БНХАУ-ын дарга Ши Жиньпин;

Пакистаны Ерөнхий сайд Шахбаз Шариф;

ОХУ-ын  Ерөнхийлөгч Владимир Путин;

Тажикстаны Ерөнхийлөгч Эмомали Рахмон;

Узбекистаны Ерөнхийлөгч Шавкат Мирзиёев;

Азербайжаны Ерөнхийлөгч Илхам Алиев;

Арменийн Ерөнхий сайд Никол Пашинян;

Монгол Улсын Ерөнхийлөгч  Ухнаагийн Хурэлсух;

Того улсын Сайд нарын зөвлөл Төрийн тэргүүн Форе Эссозимна Гнассингбе;

Туркийн Ерөнхийлөгч Режеп Тайип Эрдоган;

Лаосын Ерөнхийлөгч Тонглоун Сисулит;

Вьетнамын дэд ерөнхийлөгч Во Тхи Ань Суан;

Египетийн Ерөнхий сайдын орлогч Хуссейн Иса нар багтжээ.

Мөн НҮБ, ШХАБ,  Тусгаар улсуудын хамтын нийгэмлэг /ТУХН/, Хамтын аюулгүй байдлын гэрээний байгууллага (ХАБГБ)-ын Ерөнхий нарийн бичгийн дарга нар, Евразийн эдийн засгийн комиссын тэргүүн болон бусад олон улсын байгууллагуудын төлөөлөл оролцож байна.
Уулзалтаас Бишкекийн тунхаглал, олон талт хамтын ажиллагааг цаашид бэхжүүлэх, байгууллагын үйл ажиллагааг сайжруулахад чиглэсэн баримт бичиг, шийдвэрүүдэд гарын үсэг зурна.

"ШХАБ+” дээд хэмжээний уулзалтын үеэр өргөтгөсөн хэлбэрээр НҮБ-ын төв зохицуулах үүрэг болон олон улсын эрх зүйг бэхжүүлэх, тогтвортой хөгжлийг дэмжих, харилцан ашигтай хамтын ажиллагааг өргөжүүлэх талаар санал солилцох болно" гэж хэвлэлийн алба мэдээлсэн байна.