К.АНУ

Арменийн Ерөнхийлөгч асан Роберт Кочарян болон түүний ууган хүү Седрак Кочарян нарыг авлигын шинжтэй хэрэгт холбоотой  мөрдөн шалгах ажиллагааны хүрээнд саатуулжээ. Энэ талаар улсын Авлигатай тэмцэх хороо мэдээлснийг хэвлэлүүд иш татжээ.

Арменийн Үндэсний аюулгүй байдлын алба болон Авлигатай тэмцэх хорооны ажилтнууд наймдугаар сарын 25-ны өглөө Роберт Кочаряны гэр болон түүний отгон хүү, сөрөг хүчний “Армения” фракцын депутат Левон Кочаряны гэрт нэгжлэг хийжээ.

Мөн Кочаряны гэр бүлтэй холбоотой хэд хэдэн газарт мөрдөн шалгах ажиллагаа явуулсан байна. Арменийн Авлигатай тэмцэх хороо уг ажиллагаа нь авлигын гэмт хэрэгтэй холбоотой эрүүгийн хэргийн хүрээнд олон газар явагдаж байгаа гэсэн байна.

Роберт Кочаряныг Авлигатай тэмцэх хороонд хүргэсэн бөгөөд удалгүй түүний ууган хүү Седрак Кочаряныг мөн саатуулсан байна. Гэвч удалгүй Роберт Кочаряныг Үндэсний аюулгүй байдлын албаныхны хамгаалалт дор түргэн тусламжийн машинаар эмнэлэгт хүргэжээ. Роберт Кочарян саатуулагдсаныхаа дараа Авлигатай тэмцэх хороонд байцаалт өгч байсан бөгөөд биеийн байдал муудсаны улмаас эмнэлэгт хүргэсэн байна.

Арменийн Ерөнхий прокурорын газраас Ерөнхийлөгч асан Роберт Кочаряныг албан тушаалаа урвуулан ашигласан, онц их хэмжээний хээл хахууль авсан, мөнгө угаасан гэх хэрэгт буруутгаж байгаа талаар хэвлэлүүд мэдээлжээ. Прокурорын мэдээлснээр, түүнд албан тушаалаа урвуулан ашигласан гурав, онц их хэмжээний хээл хахууль авсан хоёр, мөн онц их хэмжээний мөнгө угаасан дөрвөн үйлдэлд холбогдох ял тулгасан байна.

Мөн уг хэргийн хүрээнд Кочарян болон түүний хүүгээс гадна дөрвөн хүнийг саатуулсан талаар Авлигатай тэмцэх хорооны мэдээнд дурдсаныг хэвлэлүүд иш татжээ. Гэхдээ албаны мэдээнд Ерөнхийлөгч асантай хамт саатуулагдсан бусад хүний, албан тушаалын талаар дурдаагүй байна.

Арменийн хэвлэлүүдийн мэдээлснээр, Кочаряны гэр бүлийн эзэмшилд байдаг Toyota автомашины худалдааны төвийг татварын байгууллагаас битүүмжилсэн байна. Мөн Orange Fitness спорт цогцолбор болон Play City зугаа цэнгээний төвд мөрдөн шалгах ажиллагаа явуулжээ.

Кочаряныг саатуулсан үйл явдал нь Арменийн эрх баригчид болон сөрөг хүчний хоорондын улс төрийн зөрчил үргэлжилж буй үед болж байгаа гэдгийг Известия-гийн нийтлэлд дурджээ.

Тус улсын сөрөг хүчний таван нам хүчин долдугаар сард Үндсэн хуулийн цэц парламентын сонгуулийн дүнтэй холбоотой гомдлуудыг шийдвэрлэсний дараа улс төрийн эсэргүүцлийг “илүү өргөн хүрээтэй, системтэй үе шатанд” шилжүүлэхээ мэдэгдэж байжээ. Арменийн сөрөг хүчний намуудын хамтарсан мэдэгдэлдээ тус улсын Үндсэн хуулийн цэцийн шийдвэр нь эрх баригчдын легитим шинжтэй холбоотой асуултыг арилгаж, улс төрийн хямралыг шийдвэрлэж чадаагүй гэж үзэж байгаагаа илэрхийлж байжээ.

Эх сурвалж: polit.mn