Улаанбаатарын нам гүн үдшийн намуухан уур амьсгалд энэ цагийн шилдэг яруу найрагчид “KHARKHORUM 360°” фестивалийн угтвар арга хэмжээ болох “KHARKHORUM BAZAAR”-ийн хүрээнд /2026.8.17/ үзэгчдийг утга яруу төгөлдөр үгсээр уярааж, бидний бахархал болсон эх орон, эх хэлээ магтан шүлэглэж нэгэн үдшийг яруу найргаар хөглөв. Яруу найргийн үдшийн нэгэн тод өнгө нь “Болор цом”-ын эзэн яруу найрагч С.Начин байлаа. Тэрээр эх орон, эх хэлний тухай шүлгийн дээжсээсээ уншиж, мөн хайр дурлалын тухай шүлгээрээ үзэгчдийн сэтгэлийг хөглөв.
“Болор цом”-ын эзэн яруу найрагч С.Начин “KHARKHORUM 360°” фестивалийн талаарх сэтгэгдлээ хуваалцлаа.
Тэрээр “Бидний эртний нийслэл бол Хархорум хот байсан. Фестивалийн хөтөлбөр Төв цэнгэлдэх хүрээлэнд, задгай талбай дээр олон нийтэд нээлттэй болж байна. Мөн наймдугаар сарын 22,23-нд Монголын шилдэг артистууд болон дэлхийн маш олон хамтлаг ирж байна. Энэ фестивалийн цаад үр өгөөж нь Монголын ард түмэнд хүртээмжтэй. Урлаг соёлын тухайд маш өргөн цар хүрээтэй тэмдэглэгдэж байгаад туйлын баяртай байна. “KHARKHORUM 360°”-ийн угтвар арга хэмжээ болох “KHARKHORUM BAZAAR”-т долоо дахь өдрийн арга хэмжээнд нь оролцож, үе тэнгийнхээ шилдэг сайхан найрагч нартай өөр өөрсдийн мэдрэмж, төрөл жанраар шүлэг бүтээлээ хүргэлээ.
Үндэсний том ухамсар гэдэг чинь бидний эх орон, эх хэл маань. Шүлэг бичдэг хүнийхээ хувьд фестивалиа хүндлээд голдуу эх орны тухай шүлэг уншлаа.
Өв соёл маань тэр чигээрээ л бидний бахархаж явах зүйл маань. Эх хэл минь, эх орон минь. Тиймээс та бүхнийг наймдугаар сарын 22, 23-нд болох фестивальд өргөн олноороо ирж, оюун санаа, сэтгэлгээ, дотоод хүнээ баярлуулаарай гэж уриалъя" гэлээ.
