Ц.МЯГМАРБАЯР
Цөлжилттэй тэмцэх тухай НҮБ-ын Конвенцын Талуудын 17 дугаар бага хурал буюу COP17 өнөөдөр Монгол Улсын нийслэл Улаанбаатар хотноо эхэллээ. Өндөр түвшний энэхүү хурал энэ сарын 17-28-ны өдрүүдэд үргэлжилж, НҮБ-ын Цөлжилттэй тэмцэх конвенцын 197 талын төлөөлөл оролцож байна. Энэ удаагийн COP17 “Эх байгалиа сэргээе, итгэл найдвараа бадраая” уриан дор цөлжилт, газрын доройтол, гангийн асуудалд дэлхий нийтээрээ шийдэл эрэлхийлнэ. Мөн бэлчээрийн тогтвортой менежмент, газрын нөхөн сэргээлт, уур амьсгалын өөрчлөлтөд дасан зохицох асуудал чуулганы гол сэдвийн нэг болж байна. Монгол Улс COP17-ийг зохион байгуулж буй нь төв болон Зүүн Азид анх удаа болж байгаагаараа онцлог. Дэлхий нийтийн анхаарал газрын доройтол, цөлжилттэй тэмцэх шийдэлд төвлөрч буй энэ өдрүүдэд Монгол Улс бэлчээрийн мал аж ахуй, газрын нөхөн сэргээлт, уур амьсгалын өөрчлөлтийн нөлөөлөл зэрэг өөрийн туршлага, тулгамдсан асуудлаа олон улсын тавцанд танилцуулах боломжийг ашиглаж байна.
COP17-ын хотхон: Түр байгууламжид дэлхийн том чуулганыг зохион байгуулж байна
Өнөөдөр эхэлж буй НҮБ-ын Цөлжилттэй тэмцэх конвенцын Талуудын 17 дугаар бага хурал буюу COP17-ын гол үйл ажиллагааг Үндэсний цэцэрлэгт хүрээлэнд байгуулсан тусгай зориулалтын түр байгууламжид зохион байгуулж байна. Тус талбай нь 8-10 мянга орчим оролцогч хүлээн авах хүчин чадалтай. Хурлын үндсэн “Blue Zone” буюу Цэнхэр бүс нь олон нийт, байгууллага, бизнесийн оролцоог хамарсан “Green Zone” буюу Ногоон бүс гэсэн хоёр байгууламжтай. Энэ удаагийн бүтээн байгуулалтын нэг онцлог нь байнгын барилга байгууламж шинээр босгохоос илүүтэй, олон улсын хэмжээний хурлын хэрэгцээнд нийцсэн түр байгууламж, дэд бүтэц, уулзалтын орон зайг богино хугацаанд цогцоор бүрдүүлсэн явдал юм. Хоёр долоо хоног үргэлжлэх хурлын үеэр зөвхөн албан ёсны хэлэлцүүлэг төдийгүй сайд нарын уулзалт, бизнесийн форум, залуучуудын форум, уугуул иргэд болон орон нутгийн иргэдийн хэлэлцүүлэг, бэлчээр ба малчдын асуудал, ус, газрын нөхөн сэргээлт, хүнсний тогтолцоо зэрэг олон арга хэмжээ нэг дор зохион байгуулагдана.
Ингэснээр Үндэсний цэцэрлэгт хүрээлэнгийн талбай хоёр долоо хоногийн хугацаанд дэлхийн улс орнуудын газрын доройтол, цөлжилт, гангийн асуудлаар шийдэл эрэлхийлэх олон улсын хотхон болж байна.
COP17-д анхаарал татах гол төлөөлөгчид
Ясмин Фуад /Yasmine Fouad/НҮБ-ын Цөлжилттэй тэмцэх конвенцын Гүйцэтгэх нарийн бичгийн дарга. Тэрээр COP17-ын гол зохион байгуулагч талын өндөр түвшний төлөөлөгч бөгөөд газрын доройтол, гангийн тэсвэржилт, ус-газрын уялдаа, санхүүжилтийг чуулганы гол асуудал гэж онцолж байна. Монгол Улсын Байгаль орчин, уур амьсгалын өөрчлөлтийн сайд Ц.Сандаг-Очир Монголын талаас COP17-ын бодлого, зохион байгуулалтыг ахалж буй гол хүмүүсийн нэг. Тэрээр газрын доройтсон экосистем, ялангуяа бэлчээр, газар тариалангийн талбайг нөхөн сэргээхэд төр, иргэд, бизнесийн хамтын ажиллагааг чухалчилж байна. Монгол Улсын Гадаад харилцааны сайд Б.Батцэцэг COP17-ыг олон улсын хамтын ажиллагаа, газрын доройтлыг бууруулах, Тогтвортой хөгжлийн зорилтуудтай уялдуулах чиглэлд Монголын байр суурийг илэрхийлж буй өндөр түвшний төлөөлөгч. Жаап ван Хиерден /Jaap van Hierden/НҮБ-ын Монгол дахь суурин зохицуулагч. НҮБ-ын системийн Монгол дахь байгууллагуудын COP17-д үзүүлж буй дэмжлэг, хамтын ажиллагааг зохицуулж байна. 197 талын Засгийн газар, олон улсын байгууллага, шинжлэх ухаан, бизнес, иргэний нийгэм, залуучууд, уугуул иргэд, малчдын төлөөлөл зэрэг ойролцоогоор 4000 гаруй төлөөлөгчид оролцож байна. COP17 нь зөвхөн төрийн сайд нарын хурал биш газрын доройтол, ган, бэлчээрийн асуудалд шууд хамааралтай олон талын оролцогчдыг нэг дор цуглуулж байгаа юм.
СОР17 гол уриа:
“Монгол Улс сорилтоос шийдэл гаргаж хамтран ажиллахыг бүх дэлхийд уриалж байна. Үүгээрээ COP17-оор дэлхийд манлайлна”
Эх сурвалж: “Зууны мэдээ” сонин
2026 ОНЫ НАЙМДУГААР САРЫН 17. ДАВАА ГАРАГ. № 152 (7894)
Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.
Үнэн мэдээллийг хамтдаа хамгаалцгаая.
Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn
