Н.Түшиг

АНУ-ын Ерөнхийлөгч Дональд Трамп наймдугаар сарын 3-ны өдөр Цагаан ордонд "President's Military Spouse Commission" нэртэй шинэ комисс байгуулах тухай гүйцэтгэх захирамжид гарын үсэг зурлаа. Энэ тухай New York Post мэдээлэв. Энэхүү шинэ комиссын зорилго нь цэргийн алба хаагчдын гэр бүл, ялангуяа эхнэр, нөхөрт тулгардаг асуудлыг судалж, шийдвэрлэх бодлогын зөвлөмж боловсруулах явдал юм. АНУ-ын цэргийн гэр бүлүүд дунджаар 2–3 жил тутамд шинэ газар руу шилжин суурьшдаг. Цэргийн алба хаагчдын эхнэр, нөхөр ажилгүй болох эсвэл дахин ажил хайх шаардлагатай болдог. Цэргийн алба хаагчдын эхнэр, нөхрийн ажилгүйдлийн түвшин АНУ-ын дунджаас өндөр буюу 20 орчим хувь байдаг байна. Түүнчлэн цэргийн алба хаагчдын хүүхдүүд цэцэрлэгээс ахлах сургууль төгстлөө дунджаар 6–9 удаа сургууль сольдог байна. Мөн цэргийн алба хаагчид удаан хугацаагаар томилолтод явах нь элбэг тул гэр бүлийн ачаалал ихэвчлэн нэг хүнд ногддог талаар АНУ-ын Батлан хамгаалах яам онцолжээ. Комиссыг Батлан хамгаалахын сайд Пит Хегсетийн гэргий Женнифер Хегсет удирдана. Тэрээр олон жилийн турш цэргийн баазуудад амьдарч, цэргийн гэр бүлийнхэнтэй уулзан, тэдэнд тулгардаг бэрхшээлийг сонсож ирснээ хэлжээ. Түүний хэлснээр, “Комиссын бүрэлдэхүүнд өөрсдөө олон арван жилийн турш цэргийн гэр бүл байсан хүмүүс багтсан тул бодит нөхцөл байдлыг хамгийн сайн ойлгодог хүмүүс зөвлөмж боловсруулна” гэжээ. Ёслолын үеэр Ерөнхийлөгч Трамп: “Дэлхийн хамгийн хүчирхэг армийг гайхамшигтай эхнэр, нөхөр, гэр бүлийнхний хайр, үнэнч дэмжлэггүйгээр байгуулж чадахгүй” хэмээн мэдэгдэж, комисс нь цэргийн гэр бүлийн амьдралын чанарыг сайжруулах бодитой санал боловсруулах зорилготой гэдгийг онцолсон. Женнифер Хегсет комисс Цагаан ордонд хуралдана гэж хэлэхэд Трамп “Бүр Зууван танхимыг ашиглаж болно” гэж хошигножээ. Комиссыг Дотоодын аюулгүй байдлын сайд Марквейн Маллины гэргий Кристи Маллин болон АНУ-ын Зэвсэгт хүчний салбар бүрийг төлөөлсөн цэргийн гэр бүлийн 22 төлөөлөгчөөс бүрдүүлжээ. Тус комисс хоёр жилийн хугацаанд ажиллаж, цэргийн гэр бүлийг дэмжих чиглэлээр хэрэгжүүлэх боломжтой бодлогын зөвлөмжийг Ерөнхийлөгчид өргөн барих юм.

Эх сурвалж:www.polit.mn