Ч.Бямбаа

Баяр наадмын амралттай холбогдуулан Монгол Улсын хэмжээнд үүсэж байгаа гамшгийн нөхцөл байдал ба анхаарах асуудлын хүрээнд Онцгой Байдлын Ерөнхий Газар (ОБЕГ)-аас өнөөдөр мэдээлэл өглөө. 

Үер усны ослоос урьдчилан сэргийлэх сэрэмжлүүлгийг ОБЕГ-ын Ажиллагааны удирдлагын газрын дарга, хурандаа А.Дашням танилцуулсан юм. 

Тэрээр  "Онцгой байдлын байгууллага өнөөдрөөс эхлэн өндөржүүлсэн бэлэн байдлын зэрэгт шилжин ажиллана. Аюулгүй байдлыг хангах урьдчилан сэргийлэх ажил, хариу арга хэмжээг зохион байгуулахаар бэлтгэлийг ханган ажиллаж байна.

Монгол Улсын хэмжээнд өнөөдрийн байдлаар 2,929 удаагийн аюулт үзэгдэл, осол тохиолдсон. Үүний улмаас 168 хүн амь насаа алдаж, 96 хүн бэртэж гэмтсэн бөгөөд 56.5 тэрбум төгрөгийн хохирол учирсан статистик үзүүлэлт бий. 

Энэ он гарсаар улсын хэмжээнд 11 удаагийн үерийн дуудлага ирсэн. Тодруулбал 

• зургаадугаар сарын 9-нд Баян-Өлгий аймгийн Алтанцөгц сум
• зургаадугаар сарын 17-ны өдөр Сэлэнгэ аймгийн Сүхбаатар сум
• долоодугаар сарын 8-нд нийслэлд үер буусан. 

Үер усны осолтой холбогдуулж Онцгой байдлын байгууллага усанд автсан, үерт автсан айл өрхүүдийг нүүлгэн шилжүүлэх, далан суваг сэтэрснийг бэхлэх ажлыг мэргэжлийн байгууллагуудтай хамтран зохион байгуулж байна" гэлээ. 

Үргэлжлүүлэн "Улсын хэмжээнд үерийн их болон маш их эрсдэлтэй бүсэд 175,000 өрхийн 642,000 хүн ам оршин сууж байна.

Нийслэлийн хэмжээнд үерийн эрсдэлтэй бүсэд

• долоон дүүргийн 28 хороонд зөвшөөрөлтэй 1,388,
• зөвшөөрөлгүй нийт 1,676 нэгж талбарт 1,917 айл өрх оршин сууж байгаа.

Онцгой байдлын байгууллага, мэргэжлийн байгууллагуудтай хамтраад эрсдэлтэй бүсэд оршин сууж буй иргэдэд нүүлгэн шилжүүлэх, нүүх мэдэгдлийг жил болгон хүргэж буй. 

Хур борооны улирал эхэлсэн. Иймд баяр амралтын өдрүүдэд их хэмжээний үер болоход эрсдэлтэй газар буусан айлууд өөрсдийнхөө аюулгүй байдлыг хангах чиглэлд онцгой анхаарах зайлшгүй шаардлагатай. 

Нийслэлийн хэмжээнд ус ихээр тогтдог 41 байршилд нийслэл, дүүргийн онцгой байдал, алба мэргэжлийн ангитайгаа хамтраад 60 гаруй помпыг байрлуулан ажиллаж байгаа. Их хэмжээний үер ус буусан тохиолдолд усыг соруулах, цаашлаад далан суваг сэтрэх эрсдэл бүхий газруудад сувгийг бэхлэх арга хэмжээг холбогдох төлөвлөгөөний дагуу хийж байна" гэдгийг хэллээ.

Эх сурвалж: www.polit.mn