Д.АРИУН
Оросын шинжлэх ухаан, танин мэдэхүйн хамгийн ууган сэтгүүлүүдийн нэг болох "Вокруг света" сэтгүүл энэ онд 165 жилийн ойгоо тэмдэглэж байна. 165 жилийн турш тасралтгүй гарч Оросын төдийгүй орос хэлээр уншдаг уншигчдын хэдэн үеийнхний танин мэдэхүйн хөтөч болж ирсэн сэтгүүл түүхт ойдоо зориулан энэ жил хэд хэдэн тусгай дугаар хийжээ. Тухайлбал, Оросын Усан спортын холбоотой хамтран тусгай дугаар бэлтгэж, энэ зургаадугаар сарын 3-6-нд болсон Санкт Петербургийн эдийн засгийн форумын үеэр танилцуулсан байна. Тусгай дугаар нь Орост усан сэлэлтээс эхлээд усан поло хүртэлх усан спортын түүх, тэдгээрийн урлагтай холбоотой талаас нь харуулахад чиглэсэн байна.
"Вокруг света" сэтгүүлийн ерөнхий редактор Мария Мернова хэлэхдээ "Бид бусад соёлд үүссэн усан спорт Орост хэрхэн шинэ тайлбар авсан, спортын салбаруудыг шинэ утга агуулгатай болгосон, урлагийн гоо зүй, орчин үеийн спортын хөгжилд өндөр технологи хэрхэн үүрэг гүйцэтгэж байгаа зэргийг судлах сонирхолтой байсан" гэж тусгай төслийнхөө талаар тайлбарласан байна.
Хиймэл оюун ухаан хөгжиж байхад хэвлэмэл хэвлэл, тэр дундаа сэтгүүл яах вэ үлдэх үү, алга болох уу гэдэг асуулт хаа сайгүй байдаг. Яг ийм утгатай асуултад 165 жилийн түүхтэй сэтгүүлийн ерөнхий редактор телевизийн нэвтрүүлэгт орох үеэрээ “Сэтгүүл уншигчдад танил сэдвийг тэс өөр, ер бусын өнцгөөс харуулж чаддаг учраас үнэ цэнээ алдахгүй” гэж хариулсан байна.
Эх сурвалж: polit.mn
