Ч.Бямбаа
Ерөнхий сайд Н.Учрал болон Засгийн газрын гишүүд "Бизнесийн эрх чөлөөний тухай хууль"-ийг нэн яаралтай горимоор УИХ-д өргөн мэдүүлэхээр болсон талаар мэдээллээ. Тус хуулиар зөвшөөрлийн тогтолцоог хялбаршуулах, хөрөнгө оруулалтын орчныг сайжруулах, татварын тогтвортой байдлыг хангах, хиймэл оюун ухаан, дата төв зэрэг шинэ салбарын хөрөнгө оруулалтыг дэмжих эрх зүйн орчныг бүрдүүлэхээр тусгасан байна.
Ерөнхий сайд Н.Учрал:
-Бизнесийн эрх чөлөөний тухай хуулиар татвар болон нийгмийн даатгалын өртэй гэх шалтгаанаар зөвшөөрөл олгохоос татгалздаг байдлыг зогсоохоор тусгасан. Мөн тусгай зөвшөөрлийг дуусахад шинээр зөвшөөрөл авч байгаа мэт бүх шаардлагыг дахин хангуулдаг тогтолцоог өөрчилж байна. Үүний оронд үйл ажиллагаанд нь явцын хяналт тавьж, шаардлага хангасан тохиолдолд зөвшөөрлийг 10 жил болгоно. Энгийн зөвшөөрлийн хугацааг ч мөн уртасгаж, өмнө нь гурван жил байсан хугацааг таван жил болгохоор тусгасан. Түүнчлэн иргэн, аж ахуйн нэгж төрийн байгууллагад энгийн зөвшөөрөл хүссэн өргөдөл гаргаснаас хойш 22 хоногийн дотор хариу өгөөгүй бол зөвшөөрөл олгогдсонд тооцож үйл ажиллагаагаа эхлүүлэх боломжтой болох зохицуулалтыг тусгасан юм.
Төрийн худалдан авах ажиллагааг хиймэл оюунд суурилсан, хүний оролцоогүй сонгон шалгаруулалтын системээр зохион байгуулах эрх зүйн орчныг мөн бүрдүүлж байгаа. Хөрөнгө оруулалтыг дэмжих хүрээнд хөрөнгө оруулагчийн дата төв болон хиймэл оюуны үндсэн хөрөнгөөр бүртгэгдсэн мэдээллийн технологийн зориулалттай тоног төхөөрөмжийн импортын гаалийн албан татварыг 100 хувь чөлөөлөхөөр тусгасан. Засгийн газраас дэвшүүлж буй авлигын эсрэг чөлөөлөлт, ногоон хөгжлийн чөлөөлөлт, эрх зүй дүрэм журмын чөлөөлөлт, эдийн засгийн чөлөөлөлт гэсэн дөрвөн чиглэлийн шинэчлэлийг хэрэгжүүлэх суурь хуулийг Улсын Их Хуралд өргөн мэдүүлсэн. Үүнтэй хамт хөрөнгө оруулалтад саад болж буй олон хууль, эрх зүйн зохицуулалтад өөрчлөлт оруулахаар тусгаад байна.
Тэргүүн Шадар сайд Ж.Энхбаяр:
-Энэхүү хуулийн өөрчлөлтөөр Монгол Улс бизнесийн орчноо илүү сайжруулж, хөрөнгө оруулагчдад итгэл төрүүлсэн, тогтвортой бөгөөд найдвартай түнш улс гэдгээ дахин батлан харуулах боломж бүрдэх юм. Хөрөнгө оруулагчдын хувьд хамгийн чухал зүйл нь урт хугацааны тогтвортой бодлого, ойлгомжтой эрх зүйн орчин байдаг. Тиймээс бид хөрөнгө оруулалтад саад болж буй хүнд суртал, давхардсан зохицуулалтуудыг багасгаж, бизнес эрхлэхэд илүү таатай нөхцөлийг бүрдүүлэхээр зорьж байна. Хиймэл оюунд зориулсан үндэсний дата төв буюу шинэ бизнест Монгол Улс ээлтэй бүс нутаг болно. Бидэнд нөөц баялаг хангалттай байгаа.
Шадар сайд Т.Доржханд:
-Татварын орчны тогтворжилтыг бид илүү шуурхай, үр дүнтэй хэрэгжүүлэхээр ажиллаж байна. Хуулийн төсөлд тусгаснаар 50 тэрбум төгрөгөөс дээш хэмжээний гадаадын хөрөнгө оруулалт орж ирсэн тохиолдолд тухайн хөрөнгө оруулалтад 20 хүртэл жилийн хугацаатай татварын орчны тогтворжилт олгох боломж бүрдэх юм. Томоохон хөрөнгө оруулагчид урт хугацаанд тогтвортой татварын болон бодлогын орчинд ажиллах сонирхолтой байдаг. Энэхүү хуулийн өөрчлөлтөөр бид энэ хэрэгцээг бүрэн хангах нөхцөлийг бүрдүүлж байна.
Мөн Монгол Улсад хэдийн хөрөнгө оруулалт хийсэн гадаадын хөрөнгө оруулагчдын өмнө тулгарч буй гомдол, маргааныг илүү шуурхай шийдвэрлэх механизмыг тусгасан. Асуудлыг шууд шүүхийн шат руу оруулж удаашруулахын оронд арбитраар шийдвэрлэх, эсвэл зуучлалын хэлбэрээр эвлэрүүлэн зохицуулах боломжийг бий болгож байгаа юм. Ингэснээр хөрөнгө оруулалтын үйл ажиллагаанд үүсдэг хүндрэл, саатлыг багасгах нөхцөл бүрдэнэ. Засгийн газрын дэвшүүлсэн дөрвөн чөлөөлөлтийн нэг нь ногоон чөлөөлөлт юм. Бид ногоон эдийн засгийн бодлогыг тууштай хэрэгжүүлэхээр зорьж байгаа бөгөөд энэ хүрээнд сэргээгдэх эрчим хүч болон ногоон эрчим хүчтэй холбоотой төслүүдэд ашиглагдах тоног төхөөрөмжийг 100 хувь гаалийн албан татвараас чөлөөлөхөөр тусгаж байна.
Эх сурвалж: www.polit.mn
