Б.ХУЛАН

Эдийн засгийн байнгын хорооны өнөөдрийн /06.03/ хуралдаанаар Бүгд Найрамдах Австри Улсын Засгийн газар болон Монгол Улсын Засгийн газар хооронд байгуулах Санхүүгийн хамтын ажиллагааны хэлэлцээрийн төслийг хэлэлцлээ. Австри улсын Ерөнхийлөгч Александр Ван дер Беллений 2025 оны тавдугаар сард Монгол Улсад хийсэн төрийн айлчлалын үеэр хоёр улсын Сангийн яам хооронд 60 сая еврогийн эх үүсвэртэй Санхүүгийн хамтын ажиллагааны хэлэлцээр байгуулах эрмэлзлийн захидал байгуулжээ. Үүний дагуу төслийн жагсаалтыг Австрийн талд хүргүүлж, санхүүжилтийн хэмжээг 65 сая евро байхаар тохиролцсон байна.

Тус эх үүсвэрээр Хавдар судлалын үндэсний төв, Гэмтэл согог судлалын үндэсний төв, Эх хүүхдийн эрүүл мэндийн үндэсний төв, Улсын нэгдүгээр төв эмнэлэг, Цэргийн төв эмнэлэг, Төрийн тусгай албан хаагчдын нэгдсэн эмнэлэг, Улсын дуурь бүжгийн эрдмийн театр зэрэг долоон байгууллагын нэн шаардлагатай тоног төхөөрөмжийг шинэчлэх, суурилуулах, хүний нөөцийг чадавхжуулах төслүүдийг хэрэгжүүлэхээр төлөвлөжээ. Зээлийн нөхцөлийн хувьд жилийн 1 хувийн хүүтэй, 0.9 хувийн хүүгийн баталгааны шимтгэлтэй, 19 жилийн хугацаатай бөгөөд эхний дөрвөн жилд үндсэн төлбөрөөс чөлөөлөгдөх юм. Энэхүү хэлэлцээр нь олон улсын гэрээний ангилалд хамаарах тул УИХ-аар заавал соёрхон батлуулах шаардлагатайг Сангийн сайд З.Мэндсайхан онцоллоо.

УИХ-ын гишүүн О.Батнайрамдал:

-1.9 хувийн нийт өртөгтэй, 19 жилийн хугацаатай ийм нөхцөлтэй зээл манай улсад ховор боломж. Хамгийн гол нь татвар төлөгчдийн мөнгөөр эргэн төлөгдөх учраас зөв газарт, үр өгөөжтэй зарцуулагдах ёстой. Санхүүжилтийн дийлэнх хэсэг нь эрүүл мэндийн салбарт чиглэж байгаа нь зарчмын хувьд зөв гэж үзэж байна.

УИХ-ын гишүүн Г.Лувсанжамц:

-Уг санхүүжилт эрүүл мэндийн салбарын бодлогын шалгуур үзүүлэлтүүдэд хэрхэн нөлөөлөх, мөн төслүүдийг эрэмбэлэх аргачлал ямар байсан талаар тодрууллаа.

ЭМЯ-ны Төрийн нарийн бичгийн даргын албан үүргийг түр орлон гүйцэтгэгч Н.Эрдэнэбаяр:

-Төслийн хүрээнд хэрэгжүүлэх тоног төхөөрөмжийн шинэчлэл нь улсын хэмжээний төрөлжсөн мэргэжлийн эмнэлгүүдэд чиглэж байгааг онцлов. Түүний хэлснээр, Монгол Улсад одоогоор оношлох, эмчлэх боломж хязгаарлагдмал байгаа 25 төрлийн өвчний тусламж үйлчилгээг хөгжүүлэх, хавдрын оношилгоо, эмчилгээний орчин үеийн технологийг нэвтрүүлэх, хорт хавдрын навигаци болон стереотактик эмчилгээний төв байгуулах зэрэг ажлууд хэрэгжинэ. Мөн эх, нярайн эндэгдлийг бууруулах зорилгоор ургийн гаж хөгжлийн оношилгоо, ураг болон нярайн мэс заслын тусламж үйлчилгээ, хүүхдийн эрхтэн шилжүүлэн суулгах мэс заслыг хөгжүүлэх чиглэлээр хөрөнгө оруулалт хийхээр төлөвлөжээ. Түүнчлэн гэмтэл согогийн тусламж үйлчилгээний чанар, хүртээмж, орчин нөхцөлийг сайжруулахад мөн анхаарч ажиллах юм байна.

Эх сурвалж:www.polit.mn