Дэлхий дахинд Эхийн хайраар аз жаргал түгээе! уриатай Бурханы сүм дэлхийн сайн мэдээний авралын зарын нийгэмлэг (watv.org) 2026.04.01-ний өдөр Улаанбаатар, Дархан, Эрдэнэт зэрэг томоохон хотууд төдийгүй Арктикийн ойролцоох Аляск, Бразилын Амазоны ширэнгэн ой, дэлхийн хамгийн өмнөд хот болох Аргентины Ушуаяа гээд нийт 175 орны 7800 гаруй бүс нутагт Алгасал баярыг тэмдэглэн өнгөрүүллээ. Алгасал баяр нь авралын амлалт агуулсан Бурханы баяр болохоор олон хүмүүс Алгасал баярт оролцов.
Есүс шавь нарынхаа хөлийг даруухнаар угааж жишээ үзүүлсэн үйлсийг даган, хөл угаах ёслол үйлдэн, бусдад үйлчлэх ёсыг үзүүлсэн байна. Үүний дараа тэд дурсгалын мөргөл үйлдэж, талх ба усан үзмийн дарс идэж уух ариун зоогийн ёслолд оролцон Христийн ариун золиос, хайрыг дурсан санажээ.
Итгэгчид Бурханы хайр шингэсэн энэхүү баярыг гэр бүл, найз нөхөдтэйгөө хамт тэмдэглэж байгаадаа баяртай байгаагаа илэрхийлж, “Сүүлийн жилүүдэд дайн байлдаан, эдийн засгийн хямрал нүүрлэж, газар хөдлөлт ган, гачиг, үер зэрэг байгалийн гамшиг нэрвэж, энд тэндгүй аваар осол их гарч, янз бүрийн халдварт өвчин дэлгэрэх зэрэг гамшиг тохиож буй болохоор ийм гамшгаас хамгаалдаг, алгасуулж өнгөрүүлдэг Алгасал баяр тэмдэглэж, Бурханы хамгаалалт авч байгаадаа баяртай байна” хэмээн ярьсан юм.
Бурханы сүмийн пастор Ю.Гэрэлхүү “Есүс шинэ гэрээний Алгасал баяраар мөнх амийн амлалт өгч, маргааш нь бидний эдлэх ёстой ялыг Өөрийн биеэр загалмай дээр эдлэн, нүглийг минь үүрч, хүн төрөлхтнийг гэсэн хайраа илчилсэн. Алгасал баяр сахиснаараа бид Бурханы мах, цусыг өвлөн авсан Бурханы хүүхэд болоод, мөнх амь хүлээн авч, гамшгаас хамгаалагдан, тэнгэрийн ерөөл хүртдэг юм” хэмээн онцоллоо.
“Гамшиг алгасан өнгөрнө” гэсэн утгатай Алгасал баяр (Passover) нь хуучин гэрээний Гэтлэл номд анх гардаг. 3500 жилийн өмнө Израилийн ард түмэн Бурханы тушаалын дагуу ариун тооллын 1-р сарын 14-ний орой уг баярыг хурганы цусаар тэмдэглэж байжээ. “Сүйрлийн ямар ч гамшиг та нар дээр буухгүй” гэсэн амлалтын дагуу ууганууд үхэх их гамшгаас хамгаалагдаж, Египетийн боолчлолоос чөлөөлөгдсөн энэ өдрийг Бурхан “Үе уламжлан үүрдийн зарлиг болгон тэмдэглэ” хэмээн тушаасан байдаг (Гэтлэл 12-р бүлэг).
Хүн төрөлхтний аврал дэлхий даяар түгэх нэгэн шинэ хуудас нээгдсэн өдөр ч мөн Алгасал баярын өдөр ажээ. Есүс Христ Алгасал баяраар хүн төрөлхтөнд авралын амлалт соёрхсон юм. Тэрээр “Миний махыг идэж, миний цусыг уусан хүн мөнх амьтай” хэмээгээд, талх, дарсыг Өөрийн мах, цус болгон тогтоож, түүнийг хүртсэн хүнд нүглийн уучлал, мөнх амь өгнө хэмээн шинэ гэрээг тунхагласан байна. Маргааш нь загалмай дээр хүн төрөлхтний нүглийг үүрэн золиослогдсоноор тэднийг хайрласан хайраа батлан харуулсан юм. (Матай 26-р бүлэг, Лук 22-р бүлэг, Иохан 6-р бүлэг).
Петр, Иохан, Паул зэрэг элч нар болон анхны сүмийнхэн “Алгасал баярыг сахиж Намайг дурсаарай” (Лук 22-р бүлэг) гэсэн Христийн үгийг даган шинэ гэрээний Алгасал баярыг эрхэмлэн сахиж байсан нь Библид тэмдэглэгдэн үлджээ. Гэвч сүм ялзарч МЭ 325 оны Никеагийн шашны хурлаар уг баярыг халж, 1600 гаруй жилийн турш сахиж чадаагүй юм байна. Харин өнөө үед анхны сүмийн үед сахиж байсныг тэр хэвээр нь сэргээн сахиж буй цорын ганц сүм нь Бурханы сүм ажээ.
Бурханы сүм нь шинэ гэрээний Алгасал баярт шингэсэн Христийн хайрыг дамжуулахын төлөө Монгол улсад 15 гаруй жилийн турш олон талт сайн дурын ажиллагааг зохион байгуулсаар иржээ. Улаанбаатар, Дархан, Эрдэнэт зэрэг хотуудад эмзэг бүлгийн иргэдэд эмнэлгийн тусламж үзүүлэх, амьжиргааны дэмжлэг олгох, байгаль орчин цэвэрлэх, гамшгийн үеийн яаралтай тусламж, боловсролын салбарыг дэмжих зэрэг үйл ажиллагаа тогтмол явуулж байгаа юм байна. Үүний үр дүнд Байгаль орчин, аялал жуулчлалын яам, Эрүүл мэнд, нийгмийн хамгааллын яам болон бусад байгууллагаас олон шагнал урамшуулал хүртжээ. Бурханы сүм 2026 онд ч дэлхийн өнцөг булан бүрд сайн мэдээ түгээж, Бурханы хайрыг дамжуулах зорилготойгоор ажиллаж байгаа аж.
