Б.ОЧИР

УИХ-ын 2026 оны хаврын чуулганы эхний өдөр АН-ын дарга О.Цогтгэрэл “...АН-ын бүлгийн 41 гишүүн намын дарга УИХ-ын даргаар ажиллаж болохгүй гэдэг шийдвэрт санал нэгдсэн. Олон намаас бүрдсэн УИХ-ын дарга намын даргын албыг давхар хаших нь зохисгүй. Намын дарга, УИХ-ын даргын ажлаа хольж хутгаж байна. Тиймээс Н.Учралыг УИХ-ын даргын албан тушаалаа өгөх хүртэл УИХ дахь АН-ын бүлэг чуулганы хуралдаанд оролцохгүй” гэж мэдэгдсэн. Ингэж “ажил хаялт” зарлаад 14 хоносон. Энэ долоо хоногоос чуулганы үйл ажиллагаанд оролцож эхэлж байна. Гэхдээ, дээрх “ажил хаясан” 14 хоногийн хугацаанд намынхаа дотоод сонгуулийг зохион байгуулсан юм. Тус намынхан ҮБХ-ны гишүүдээ сонгосон. Гэвч, энэ сонгуулийнх нь явц дундаас л “…Намын дотоод сонгууль будилаантай боллоо”, “…Сонгуульд царцаа ашиглаж байна”, “…Намын удирдлагууд худалдагдсан байна” гэх гомдлууд гарч эхэлсэн. Улмаар, энэ нь эсэргүүцлийн хэлбэрт орж, дотоод сонгуулиа эсэргүүцсэн АН-ын гишүүд одоо ч гомдол санал тавьсаар байна. Гэхдээ АН-ын удирдлагууд дотоод сонгуулийнхаа үр дүнд сэтгэл хангалуун байгаа бололтой. УИХ-ын гишүүн С.Цэнгүүн “…АН-ын дунд шатны байгууллагын аймаг дүүргийн намын хорооноос ирсэн ирцийн мэдээллээр гишүүд 72 хувьтай оролцсон. Нийт 4250 хүний 2550 нь эрэгтэй, 1700 эмэгтэй байна.  ҮБХ-нд 378 гишүүн сонгогдсон. ҮБХ-ны гишүүдээс 60 хувь нь 40-өөс доош насны залуус сонгогдсон байна. Энэ нь АН-д өмнө нь байгаагүй асар том шинэчлэл боллоо” гэсэн юм. Одоогоор тус намын дотоод сонгууль үргэлжилж, Хяналтын ерөнхий хороо гэх мэт бүтцийн байгууллагуудаа бүрдүүлэх үйл ажиллагаагаа зарлаад байна. Хуанли ёсоор гуравдугаар сарын 10-наас дөрөвдүгээр сарын 1-нд дотоод сонгуулиудаа явуулаад, дөрөвдүгээр сарын 7, 8-нд АН-ын Их хурал болно. Түүгээр шинэ бүтцээ батламжилж, албан ёсны ҮБХ болон Ерөнхий нарийн бичгийн дарга, Улс төрийн зөвлөлийн гишүүдийг томилох юм. Харин сүүлийн өдрүүдэд АН-ын гишүүдийн зүгээс “…Дотроо тэмцэлдэхээ больё” гэсэн уриалгыг намынхандаа хандаж гаргах болжээ. Тухайлбал, АН-ын гишүүн Б.Мөнхболор “…Би 2002 онд МУИС-ийн оюутан болоод АН-д гишүүнээр элссэн. 24 жил үзэл бодол, үнэт зүйлийнхээ төлөө үнэнч явна. Тиймээс АН-ын эрхэм журмын нөхөддөө уриалга гаргаж байна” гээд “…Миний бие сая болсон намынхаа дотоод сонгуульд Дундговь аймагтаа ҮБХ-ны гишүүнд өрсөлдөөд уналаа. Гэлээ гээд нэг үг ч ган хийж, бусдад буруугаа чихэж гоншгоносонгүй. Өөртөө л дүгнэлт хийв. Яахав дээ, сум орон нутгийн залуучууд маань ҮБХ-ны гишүүн болж үзэг л дээ. Ялсан нь “…Шударга сайхан сонгууль боллоо”, ялагдсан нь “…Шудрага бус мөнгөний сонгууль боллоо” гэж нам руугаа дайрах юм. Мэдээж, улс орон даяар нэгэн зэрэг болсон дотоод сунгаанд алдаа, оноо гарсан байхыг үгүйсгэх гэсэнгүй ээ. Гэхдээ, том зургаар нь харвал энэ чинь л шинэчлэл, энэ чинь л ардчилал, энэ чинь л манай нам юм биш үү, нөхөд өө. Магадгүй, энэ ялагдал чинь маргаашийн ялалт чинь ч байж мэднэ. Тиймээс, одоо хэдүүлээ урагшаа харж, улс төрийн үндсэн ажилдаа орвол яасан юм бэ. Эхнээсээ бид ялаад эхэллээ. “…УИХ-ын толгойд аль нэг намын дарга байж болохгүй. гэсэн эсэргүүцэл маань үр дүнгээ өгч байна. Энэ мэт Монголын төрийн систем, салбар бүрт буй алдаа бүрийг засаад явах ёстой. Дараагийн удаа Туулын бургасыг хядаж байгаа буруу бодлого, буруу төлөвлөлтийг засах ёстой. Манай намын хамгийн сул тал бол дотоод тэмцэл, эв нэгдэлгүй байдал гэж хувьдаа хардаг. Үүнийгээ л засаад янзлаад явчихвал олон олон ялалт биднийг хүлээж байна. Улс орноо зөв бодлого, зөв хөгжилд нь аваачих бидний үндсэн том эрх ашиг биш гэж үү, эрхэм журмын нөхөд өө. Хувийн эрх ашгаа түр хойш нь тавьж, урагш харж намын дотоод асуудлаа хурдан дуусгаж, эдийн засгаа тэлж, хувийн хэвшлээ сэхээнээс гаргаж, ахмадынхаа тэтгэвэрийг нэмж, залуустаа сурах, амьдрах тэгш боломжийг нь олгох гээд олон чухал асуудлууд биднийг хүлээж байна. Иймд та бүхэндээ энэхүү уриалгыг гаргаж байна” гэжээ.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 31. МЯГМАР ГАРАГ. № 60 (7802)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn