Ц.МЯГМАРБАЯР

Булган аймгийн Засаг дарга Д.Пүрэв-Очиртой цаг үеийн асуудлаар ярилцав.

-Булган аймагт орон нутгийн болон улсын төсвийн хөрөнгө оруулалтаар хийгдэж байгаа болон цаашид хийхээр төлөвлөж байгаа бүтээн байгуулалтын ажлуудаасаа танилцуулна уу?

-Булган аймгийн тэргүүлэх зорилт бол “Ухаалаг хөдөө аж ахуй” -г хөгжүүлэх. Хоёрдугаарт нь аялал жуулчлал. Түүнчлэн дэд бүтэц, орон сууцжуулах мөн хувийн хэвшилтэйгээ хамтарч худалдаа үйлчилгээг нэмэгдүүлэх зорилготой. Энэ онд улсын төсвөөс 5.0 тэрбум гаруй төгрөгөөр булган аймгийн Цагдаагийн газрын шинэ байрыг барьж байгуулахаар баталсан. Мөн 2025 онд болсон Засгийн газрын өргөтгөсөн хуралдаанаар баталсан бүтээн байгуулалтын төсөл арга хэмжээний ажлуудын хөрөнгө төсөвт сууж энэ оноос тендер зарлах ажлуудыг хийж байна. Хууль сахиулах байгууллагын ажилтан албан хаагчдын ажиллах таатай нөхцөлийг бүрдүүлэх нь хүн төвтэй улс , хүнээ хөгжүүлэх  бодлоготой уялдаж байгаа. Мөн Булган аймгийн 90 жилийн ой ирэх 2028 онд тохионо. Булган аймгийн төв талбайд Цогт хунтайж болох Чингис хааны алтан урлагийн хааны талбайг тохижуулах, гэр бүлээрээ амрах, зугаалах таатай орчныг бүрдүүлэхийг зорьж байна. Иргэддээ худалдаа үйлчилгээгээр үйлчлэх, үзвэр, соёлын арга хэмжээ зохион байгуулах ажлыг бүрдүүлнэ. Түүнчлэн өвлийн улиралд мөсөн хотхон байгуулж өргөжүүлэхээр ажиллаж байна. Энэ сарын 7-нд УИХ-ын дарга Н.Учрал Булган аймагт ирж ажиллах үеэрээ Булган аймгийн Хөгжимт жүжгийн хүрээлэнг шинээр барих хөрөнгө оруулалтыг ирэх жилийн улсын төсөвт суулгаж өгөхөөр боллоо. Ингэснээр 2028 онд 90 жилийн ойгоор 600 хүний суудалтай хоёр танхимтай шинэ театртай болох боломж бүрдэнэ. Яагаад театрт үзвэр үйлчилгээнд их мөнгө зарцуулах болов гээд судлахаар иргэд цахим орчноос эх сурвалжгүй, худал, нэг нэгнээ гүтгэсэн, хуурсан мэдээлэл авдаг нь их  болсон байна. Түүнчлэн зохисгүй видео бичлэг ихээр явдаг. Тэгэхээр иргэдийн сэтгэл санааг амар тайван болгох, соён гэгээрүүлэх орчныг өөрчлөх, илүү амьд тогтолт, урлаг уран сайхнаар үйлчлэх, соёлын бүтээлч үйлдвэрлэлийг бий болгох, чадварлаг уран бүтээлчдийнхээ тайзыг томруулъя гэсэн санаагаар удаа дараа санал болгож 18.2 тэрбум төгрөгөөр барихаар зураг, төсвөө Сангийн сайдад танилцуулсан. Мөн манай Булган сумын III сургуулийн дотуур байрны нөхцөл байдал цахим орчинд нэлээд шүүмжлэлтэй тулгарч байгаа. Энэ бол үнэн. Бид 21 дүгээр зуунд аймгийн төвдөө гаднаа нийтийн бие засдаг газартай, усаа зөөвөрлөдөг нь  сургуулийн орчин байна гэдэг үнэхээр үнэн. Тиймээс энэ нөхцөл байдлыг сайжруулахаар 2027 оны төсөвт 6.0 тэрбум төгрөг төсөвлөсөн саналаа УИХ-ын дарга, сангийн сайд, БСШУЯ-ны төрийн нарийн бичгийн даргад тавьж байна. Ерөнхийдөө “Булганы сэргэлт” хөтөлбөрийн хүрээнд 2025-2028 онд тусгасан бүтээн байгуулалтын ажлууд хийгдэж байна. Нийт энэ хөтөлбөрт дөрвөн зорилт бүхий 13 дэд хөтөлбөр, 150 төсөл арга хэмжээг хэрэгжүүлэхээр бусад олон улсын байгууллагын хандив, хөнгөлөлттэй зээл, улсын төсвөөр хийх санхүүжилтийг босгохоор ажиллаж байна. Мэдээж орон нутагт оногдсон төсвөө нэмэгдүүлэхэд анхаарч бодитой ажил болгох чиглэлд анхаарна.

- Булган аймагт орон сууцны хөтөлбөрийн хэрэгжилт ямар шатандаа байна вэ?

- Аймгийн ИТХ-ын 2025 оны зургаадугаар сарын 27-ны өдрийн IX/68 дугаар тогтоолоор батлагдсан “Булган орон сууц” хөтөлбөр  хэрэгжиж байна. Тус хөтөлбөрийн хүрээнд таван зорилтын 18 үйл ажиллагааг үе шаттайгаар хэрэгжүүлж, уламжлалт болон дэвшилтэт технологийг хослуулсан, иргэдийн хэрэгцээ шаардлагад нийцсэн, хямд өртөгтэй, хүртээмжтэй орон сууцны бодлогыг хөгжүүлэхэд чиглэж байна. Хэрэгжилтийн хүрээнд төр, хувийн хэвшлийн хамтын ажиллагааны хүрээнд Булган суманд дөрвөн блок, 146 айлын орон сууц, улсын төсвийн хөрөнгө оруулалтаар Хутаг-Өндөр суманд найман айлын төрийн албан хаагчдын орон сууц тус тус ашиглалтад орсон. Булган орон сууц хөтөлбөрийн хүрээнд Булган суманд баригдаж буй 15 айлын түрээсийн орон сууцны барилгын 2025 оны төлөвлөгөө 100 хувь биелж, 2027 онд ашиглалтад орохоор төлөвлөсөн.Энэхүү түрээсийн орон сууц ашиглалтад орсноор хотоос шилжин ирэх нарийн мэргэжлийн болон залуу төрийн албан хаагчдыг орон сууцаар хангах таатай нөхцөл бүрдэнэ. Хөтөлбөрийн хэрэгжилтийн үр дүнд аймгийн хэмжээнд орон сууцны хүртээмж 15.3 хувиар нэмэгдэж, Иргэдийн орон сууцтай болох боломж, нөхцөл бодитоор сайжирч байна. Түүнчлэн орон нутгийн төсвийн хөрөнгө оруулалтаар 2025 онд Булган сумын V баг, III багаас Шунхлайн уулзвараас Доод дөрвөн зам хүртэлх төв замын өргөтгөлийн ажил, мөн 6-р багийн Залуус хороололд хатуу хучилтад зам болон инженерийн шугам сүлжээний бүтээн байгуулалтын ажлууд үе шаттайгаар хэрэгжиж байна.Эдгээр ажлын хүрээнд дэд бүтцийн хүртээмж нэмэгдэж, иргэдийн эрүүл, аюулгүй, тав тухтай орчинд амьдрах нөхцөл бүрдэж байна. VII цэцэрлэг хүртэлх  таван хос шугамын ажлыг “Гуа орд” ХХК 750 сая төгрөгөөр гүйцэтгэж 116а, 116б, 5, 208,  байрны гадна шугамын өргөтгөл, шинэчлэлийн ажил хийсэн. 2025 оны байдлаар төр, хувийн хэвшлийн хамтын ажиллагааны хөрөнгө оруулалтын хүрээнд Булган суманд нийт дөрвөн блок 146 айлын орон сууц ашиглалтад орлоо. Үүнд:Булган сумын II баг "Түмэн-Алт "ХХК-ийн 25 айлын орон сууц, Булган сумын VI баг "Хишиг дулаан" ХХК-ийн "Сайхан уул-3" 20 айлын орон сууц, Булган сумын V баг иргэн Ш.Баттөрийн 56 айлын орон сууц, Булган сумын V баг  "Эрин гүрэн" ХХК-ийн 45 айлын орон сууц тус тус ашиглалтад орсон. Залуус хороололд буй 56 айл хэрэглээний халуун усанд холбогдож байна.

- Дэд бүтэц, зам гүүрний бүтээн байгуулалтын ажил ямар шатандаа явж байна. Танай нэг гүүр 2024 оны үерийн улмаас нурж унасан байсан. Энэ гүүрний засвар шинэчлэлийн ажил хэзээ хийгдэх бол?

-Булган аймгийн Булган сумын IV багийн Зүүн түрүүний гүүрний төмөр бетон хийцлэлтэй ажлын даалгаврыг гаргаж мэргэжлийн байгууллагаар зураг төсвийг хийлгэснээр 1.0 тэрбум 579 сая төгрөгийн өртөгтэй 45.8м урт төмөр бетон гүүрний төсөв батлагдаж бэлэн боллоо. Орон нутгийн авто замын сангийн хөрөнгөөр 1.0 тэрбум 579 сая - 1.1 тэрбум төгрөгийн хөрөнгө оруулалтыг тусгаж аймгийн Иргэдийн Төлөөлөгчдийн хурлаар батлуулан тендерийг зарлаад байна. Ингэснээр тус гүүрний ажил энэ ондоо хийгдэж дуусах боломж бүрдэж байгаа. Иргэдийн аюулгүй тав тухай зорчих нөхцөл боломж бүрдэж байна. "Амар тайван Булган" хөтөлбөрийн хүрээнд Булган сумын Ачуут I багийн иргэдийн аюулгүй байдлыг хангах зорилгоор камержуулах ажлыг хийхээс гадна орон нутгийн хөгжлийн сангийн хөрөнгө оруулалтаар 250 сая төгрөгийн гэрэлтүүлгийн ажлыг хийхээр төлөвлөж байна. Энэхүү ажлууд дараа дараагийн багууд дээр шат дараалалтайгаар хийгдэнэ. “Теле камерын хяналтын төв” ашиглалтад орсноор аймгийн хэмжээнд үүсэж болохуйц эрсдэлийг урьдчилан сэргийлж бууруулах юм.Энэ хүрээнд  Булган аймгийн төв суурины бүс болгоныг камержуулах ажлыг гүйцэтгэж байна.2025 оны орон нутгийн төсөвт 400 сая төгрөгийг тусгаж одоогийн байдлаар 160 гаруй ухаалаг камерыг суурилуулан хянан ажиллаж байна. Мөн найман сумын хяналтын камер болон үйл ажиллагаа явуулж буй аж ахуй нэгжүүдийн хяналтын камерыг тус төвтэй холбож хуулийн байгууллагатай хамтран ажиллаж байна. Цаашид аймгийн бүх харанхуй цэгийг камержуулж ард иргэдийн аюулгүй орчинд амьдрах нөхцөлөөр хангахаар зорьж байна.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 30. ДАВАА ГАРАГ. № 59 (7801)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn