Б.ОЧИР

УИХ-ын 2026 оны хаврын ээлжит чуулган нээсэн ч үргэлжилж чадалгүй өнөөдрийг хүрэв. Учир нь, УИХ дахь АН-ын бүлгээс бойкот зарласан. Тэд “...Н.Учрал МАН-ын дарга учраас УИХ-ын дарга байж болохгүй” гээд чуулганыг орхиод явсан. Уг нь, УИХ дахь АН-ын бүлгийн дарга О.Цогтгэрэл нь АН-ын даргын албан тушаалыг давхар хашдаг. Арай “жижиг” болохоос яг л адилхан жишээ юм. Харин ч, УИХ дахь АН-ын бүлгийн дарга О.Цогтгэрэл нь АН-ын дарга учраас улс төр хийж УИХ-ыг бойкотолж буй хэрэг. Тодруулбал, УИХ-ын үйл ажиллагааг улс төрийн зорилгоор гацаагаад нэгэн долоо хоногийг өнгөрөөв.

АН-ынхан энэ зуурт, хэлтэй амтайхан, дуулиантайхнаар орон даяар дотоод сонгуулиа хийлээ. Намынхаа ҮБХ-г байгууллаа.

Ер нь бол, УИХ-ыг бойкотолсон шалтгаануудын нэг нь энэ байсан. Мөн, УИХ-ын гишүүнийг эгүүлэн татах хуулийн төслөөс тус намынхан эмээсэн. Яагаад гэвэл, УИХ-ын АН-ын бүлэгт шүүхээс ял шийтгүүлсэн, мөрдөх байгууллага дээр хэрэгт шалгагдаж байгаа хэд хэдэн гишүүд бий. Тэр байтугай ёс зүйн асуудлаар эгүүлэн татагдах болзлоо хангасан нэг, хоёроор тогтохгүй гишүүнтэй. Тийм учраас, уг хууль дээрх олон нийтийн анхаарлыг сулартал намынхаа дотоод сонгуулийг хийж, амсхийсэн байж ч болох юм.

Юутай ч, өнгөрсөн өдрүүдэд болсон АН-ын дотоод сонгуулиар УИХ дахь АН-ын бүлгийн гишүүдийн дийлэнх нь аймаг, дүүргийн Намын хорооны дарга болцгоосон. Ингэхдээ бас хөгжилтэй гэмээр “...Аймаг орон нутгаас сонгогдсон гишүүд хотод “царцаа” болж ирээд дүүргийн намын дарга болцгоолоо” гэцгээж л байна. Учир нь, Говь-Алтайн О.Амгаланбаатар хотод ирж Баянгол дүүргийн АН-ын даргаар, Баруун бүсээс сонгогдож УИХ-ын гишүүн болсон Б.Түвшин Хан-Уул дүүргийн АН-ын даргаар сонгогджээ. Мөн АН-ын жагсаалтын 12 дээр бичигдэж УИХ-ын гишүүн болсон П.Батчимэг Өвөрхангай аймгийн АН-ын дарга, намынхаа жагсаалтын гуравт бичигдээд “сонгогдсон” УИХ-ын гишүүн Ж.Батсуурь Сүхбаатар аймгийн АН-ын хорооны дарга, намынхаа жагсаалтын 15 дээр бичигдээд УИХ-ын гишүүн болсон А.Ганбаатар Баянзүрх дүүргийн АН-ын дарга болсон байна. Түүнчлэн, Хангайн бүсээс сонгогдсон УИХ-ын гишүүн П.Мөнхтулга Архангай аймгийн АН-ын даргаар, Төвийн бүсээс сонгогдсон УИХ-ын гишүүн С.Эрдэнэболд Дархан-уул аймгийн АН-ын даргаар, Сүхбаатар, Чингэлтэй дүүргээс сонгогдсон УИХ-ын гишүүн Х.Болормаа дүүргийнхээ АН-ын дарга, Сүхбаатар, Чингэлтэй дүүргээс сонгогдсон УИХ-ын гишүүн Ц.Баатархүү Чингэлтэй дүүргийн АН-ын даргаар тус тус сонгогдлоо. Тодруулбал, УИХ дахь АН-ын бүлгийн есөн гишүүн аймаг, дүүргийн АН-ын дарга болжээ. Нэг үгээр хэлбэл, УИХ дахь АН-ын бүлгийн дарга нь АН-ын даргын албан тушаалыг хавсран хийдэг. Нэмээд, УИХ дахь АН-ын бүлгийн есөн гишүүн АН-ын хорооны дарга боллоо. Гэтэл, тэд чуулганыг бойкотлохдоо “…УИХ-ын дарга нь МАН-ын дарга байна” гээд явсан. Харин өөрсдөө энэхүү “эсрэг зарчим”-аа хэд нугалаад ажил хэрэг болгочихлоо. Тэгэхээр УИХ-ыг үргэлжлүүлэн бойкотлох боломжгүй юм. Өнөөдөр ээлжит чуулгантай. Тэд чуулганд суухаас өөр аргагүй болсон.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 26. ПҮРЭВ ГАРАГ. № 57 (7799)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn