Б.Очир
Засгийн газарт хоёр сайдын суудалтайгаар хоёр жил шахам хамтарч буй ХҮН намынхан “хүн”-ээ солих шийдэлд хүрчээ. Боловсролын сайд П.Наранбаяр болохоо байгаад тэр нь туйлдаа хүрсэн. Ер нь анхнаасаа л болохгүй нь тодорхой байсан юм. П.Наранбаяр сайн багш хэдий ч сайн менежер биш байсан. Гэвч, гүрийж явсаар өнөөдрийг хүрэв. Тиймээс, ХҮН нам П.Наранбаярыгаа татахын зэрэгцээ Боловсролын яамыг ч болихоор шийджээ. Түүний оронд гал алдах шахсан гэдэг “гал”-тай Эрчим хүчний яамыг авахаар эрх баригчидтай тохирчээ. Тус яам дээр УИХ-ын гишүүн Б.Найдалааг санал болгожээ.
СЭЗДС-д бизнесийн удирдлагын бакалавр, Япон улсын Кобе их сургуулийг хөгжлийн эдийн засагч мэргэжлээр эдийн засгийн ухааны магистр хамгаалсан Б.Найдалааг эрчим хүчний салбарыг авч явж магадгүй болоод байна. Хавар болсон, улс төр хачин богино эргэлттэй болсон. Тийм зүйлд өртчихгүй бол Б.Найдалаа гэдэг Эрчим хүчний сайдтай болно.
Гэхдээ, Б.Найдалааг Б.Чойжилсүрэнтэй улстөрчийн хувьд, эрчим хүчний салбарт яаж ажиллахынх нь тухайд харьцуулбал тэмээ ямаа, тэнгэр газар шиг зөрүүтэй. Б.Чойжилсүрэнгийн тухайд улс төрийн шалтгаанаар өргөдлөө өгч байгаагаа битүү хатуу хэлээд авсан. Үйл явдлын өрнөлөөс харахад ч тийм байгаа нь үнэн биз. Ер нь, Б.Чойжилсүрэн Эрчим хүчний сайд болоод л “…Аргална даа” гэдэг алдарт үгээр ажиллаж ирсэн. Үнэхээр ч гаднаас хараат болохоор аргалж л амь зуух нь тодорхой байдаг. Тийм учраас СЭЗДС-д эдийн засгийн онолын багш, “Анод банк”-нд Эрсдэлийн удирдлагын газрын захирал, эдийн засагч, “Хаан” банканд Эрсдэлийн удирдлагын газрын захирал, “МСиЭс”-ийн “Юнител”-д газрын захирал, Монголын эдийн засгийн форумын гүйцэтгэх захирал, Монголын банкны холбооны гүйцэтгэх захирал, Тогтвортой, ногоон санхүүжилтийн хөгжил холбооны гүйцэтгэх захирлаар ажиллаж байгаад ХҮН намд орж улс төр бараадаад удалгүй УИХ-ын гишүүн болсон түүхтэй Б.Найдалаад эрчим хүчний салбар арай л хатуудах “хоол” баймаар байгаа юм. Шулуухан хэлэхэд сайд гэдэг бол салбараас гадна улс төрийг аятайхан тэнцүүлэх хэцүү ажил байдаг. Тэр утгаараа, Б.Чойжилсүрэнгийн даагаагүй улс төрийг Б.Найдалаа даах боломжгүй юм. Ядахад, ирэх жил хязгаарлалт нь үргэлжлэхээр нөхцөлтэй, ирээдүй нь гэрэл гэгээ багатай эрчим хүчний салбарыг арай “даац”-тай улстөрч л авч явна шүү. Ядаж, Б.Чойжилсүрэнд дөхөхөөр даацтай…
Эх сурвалж: polit.mn
