Т.БАТСАЙХАН

Шадар сайд Х.Ганхуяг  "Шинэ хоршоо" хөтөлбөр болон “Стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн тухай” хуулийн шинэчилсэн найруулгын төслийн талаар байр сууриа илэрхийллээ. 

-Шинэ хоршоо хөтөлбөрийн нөхцөл байдал ямар байгаа вэ.  Цаашид зээл олгох уу?

-Өнөөдрийн байдлаар улсын хэмжээнд 10578 шинэ хоршоо байгуулагдаж, 103 мянга орчим малчин нэгдэн, нийт 894 тэрбум төгрөгийн зээл аваад байна. Зээлийг жилийн зургаан хувийн хүүтэй, 60 сарын хугацаатай олгож байгаа бөгөөд хүүгийн зөрүүг улсын төсвөөс татаас хэлбэрээр санхүүжүүлж байгаа юм. Одоогоор чанаргүй зээлийн үлдэгдэл байхгүй, эргэн төлөлт хэвийн үргэлжилж байгаа ч зээлийг зориулалтын бусаар буюу хэрэглээний зорилгоор ашиглаж байна гэх мэдээлэл нийгэмд гараад байна. Үүнтэй холбогдуулан ажлын хэсэг гарч, шалгалтын ажил хийгдэж удахгүй дүгнэлт гарна. Түүнчлэн 2026 оны төсөвт шинээр зээл олгох хүүгийн татаас тусгагдаагүй байгаа нь одоогийн зээлийн үр ашгийг нягталж, цаашид үргэлжлүүлэх эсэхийг шийдвэрлэхтэй холбоотой юм. Цаашид малчдын бүтээгдэхүүний борлуулалтыг дэмжих зорилгоор хоршоодын цахим платформыг бий болгож, томоохон худалдааны сүлжээнүүдтэй хамтран ажиллахаар төлөвлөж байна. Мөн "Шинэ хоршоо" хөдөлгөөнийг уур амьсгалын өөрчлөлт, нүүрстөрөгчийн зах зээлтэй холбох ажлыг эхлүүлсэн. Ингэснээр малын тоо толгойг зохистой хэмжээнд барьж, бэлчээрээ хамгаалсан малчид олон улсын зах зээлээс нэмэлт орлого олох боломж бүрдэх юм.

-Хаврын чуулганы хугацаанд ямар хуулийн төсөл өргөн барьж батлуулах вэ?

-Хууль эрх зүйн шинэчлэлийн хүрээнд энэ хаврын чуулганаар Гамшгаас хамгаалах тухай хууль, Нөөцийн тухай хууль болон Эдийн засгийн тусгай бүсийн тухай хуулийн нэмэлт өөрчлөлтүүдийг өргөн барина. Ялангуяа чөлөөт бүсүүдэд "нэг цонхны үйлчилгээ" нэвтрүүлж, зөвшөөрлийн тогтолцоог хялбарчлах замаар хөрөнгө оруулагчдыг татах, үйл ажиллагааг нь бодитоор идэвхжүүлэхэд анхаарч байна. Монгол Улсын лабораторийн тогтолцоонд томоохон шинэчлэл хийх шаардлага тулгараад байна.  Өнөөдөр яам бүр өөрийн лабораторитой, чиг үүргийн давхардал ихтэй байгаа­гаас гадна маргаан таслах лавлагаа лабо­ратори байхгүй байна. Шинжилгээний хариу зөрүүтэй гардгаас үүдэж эдийн засагт ихээхэн хохирол учирч байна. Тухайлбал, алтны сорьцын шин­жил­гээний зөрүүгээс шалтгаалж нэг гулд­майгаас 190 грамм алт дутах эрс­дэл илэрсэн. Шатахууны чанарын шин­жилгээгээр АИ-92 бензиний октаны тоо зарим газарт 89-тэй гарсан зөрчил илэрлээд байна. Иймд Стандартчилал, хэмжил зүйн тохирлын үнэлгээний тухай хуулийг өргөн барьж, лабораториудыг хараат бус, бие даасан болгохоор ажиллаж байна. Шинэ тогтолцоогоор лабораториудыг үндэсний лавлагаа, баталгаажуулалтын болон анхан шатны гэж шатлалтай болгож, нэгдсэн мэдээллийн санд холбох юм. Ингэснээр төсвийн үргүй зардлыг бууруулж, хүнсний аюулгүй байдал болон экспортын бүтээгдэхүүний чанарыг олон улсын түвшинд баталгаажуулах боломжтой болно гэж үзэж байна.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 18. ЛХАГВА ГАРАГ. № 50, 51 (7792, 7793)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn