Т.БАТСАЙХАН

 Эрх баригч нам өнөөдөр бага хурлаа хийж морин жилийн улс төрөө эхлүүллээ. Бага хурал намуухан эхэлсэн ч намын даргын илтгэл нам доторх зөрчил тэмцэл намжаагүй гэдгийг илэрхийлэв. Намын Ерөнхий нарийн бичгийн дарга, УИХ-ын дарга асан Д.Амарбаясгаланг намаас хөөх шийдвэр гаргажээ. Түүнтэй хамт УИХ-ын гишүүн Х.Булгантуяа, Н.Тавинбэх, А.Амундра нар хөөгдөв. Бас нэг сонин тохиолдол нь нэгэн үе мөн л МАН-ын Ерөнхий нарийн бичгийн даргын албыг хашиж явсан Ж.Мөнхбат эргэн ирж намынхаа хуралд суув. Товчоор дүгнэвэл Д.Амарбаясгалан явж, Ж.Мөнхбат ирсэн хурал боллоо. Өмнө нь намын гал тогоог атгаж, улс төрийн бодлого, сонгуулийн машиныг хөдөлгөж явсан хоёр Ерөнхий нарийн бичгийн даргын нэг нь хаалганы цаана үлдэж, нөгөө нь танхимд эргэн орж ирэв. Дашзэгвийн Амарбаясгалан бол сүүлийн жилүүдэд МАН-ын эрх мэдлийн төвд байсан хүн. Сонгуулийн ялалт, намын бүтэц, Засгийн газрын тогтвортой байдлын ард түүний зохион байгуулалт явсан гэж нам дотор үнэлдэг. Гэтэл улс төрд хамгийн ойр байсан хүн хамгийн хурдан холддог жишиг дахин давтагдав. Харин Жамъянгийн Мөнхбат нэгэн цагт намын дотоод зөрчил, шүүмжлэл, хэрэг маргааны улмаас улс төрийн тайзнаас шахагдсан ч өнөөдөр намынхаа хуралд албан ёсоор оролцож буй нь МАН-д “мөнхийн дайсан гэж байдаггүй” гэх бичигдээгүй дүрмийг батлав. Эндээс асуулт ургана.МАН үнэхээр сахилга, ёс зүйгээр шийдвэр гаргав уу, эсвэл улс төрийн шинэ тэнцвэр тогтоож байна уу? Учир нь Ерөнхий нарийн бичгийн дарга гэдэг албан тушаал бол зүгээр нэг намын ажилтан биш. Энэ бол эрх мэдлийн зангилаа, мэдээллийн урсгал, хүний нөөц, сонгуулийн стратегийг атгадаг байр суурь. Тиймээс энэ албыг хашиж байсан хүмүүсийн хувь заяа намын дотоод бодлогын жинхэнэ чиглэл байж ирсэн бичигдээгүй хуультай билээ.

Эх сурвалж:www.polit.mn