Б.ГАРЬД

Төр нийгмийн зүтгэлтэн С.Зоригийг хөнөөсөн хэргийг мөрдөн шалгах үйл ажиллагаа 2023 оноос дахин “шинэ”-ээр эхэлж, нэлээд эрчтэй явж байсан. “…Уг хэрэгт ял шийтгүүлээд байсан Б.Содномдаржаа, Т.Чимгээ нарыг эрүүдэн шүүж хэрэг хүлээлгэсэн” гэх шийдвэрийг шүүх 2019 онд гаргаснаар ийм нөхцөл үүссэн. Тэр ажлын хэсгийг тухайн үеийн ЭЦА-ны дарга Т.Сүхболд ахалж байв. Тэрээр удалгүй ЦЕГ-ын даргаар томилогдсон учир ажлын хэсгийг ахлах үүрэг ЭЦА-ны дараагийн даргад шилжсэн байна. Хамгийн гол нь тус ажлын хэсэг өнгөрсөн хугацаанд 1998 оны аравдугаар сарын 3-нд хэргийн газраас олдсон зарим эд зүйлд ДНХ-гийн шинжилгээ хийлгэж, түүнийхээ дагуу мөрдөн шалгах ажиллагаа явуулж байсан юм. Мөрдөн шалгах ажиллагаа нь өнгөрсөн 2024 онд нэлээд эрчимжиж, үр дүнд хүрч буй талаар мэдээлж байсан. Тиймээс ажлын хэсгээс өнгөрсөн хавар холбогдох албаны хүмүүст хэргийн явц, үр дүнгийн талаарх танилцуулгыг хийгээд байжээ. Гэвч энэ долоо хоногийн эхээр тус ажлын хэсэгт голлох үүргийг гүйцэтгэж байсан ЭЦА-ны дарга Э.Сэргэлэнбаатар өргөдлөө өгч ажлаасаа чөлөөлөгдсөн байна. Мөн ажлын хэсгийн хэд хэдэн мөрдөгчийг өөрчилжээ. Түүнчлэн, үүнээс нэг сар орчмын өмнө Т.Сүхболдыг ЦЕГ-ын даргын үүрэгт ажлаас нь чөлөөлсөн. Эндээс “…С.Зоригийг хөнөөсөн хэргийг мөрдөж байсан ажлын хэсгийг дахиад задлав уу” гэж харагдаж байна.

Эх сурвалж: “Зууны мэдээ” сонин

2025 ОНЫ АРВАНХОЁРДУГААР САРЫН 4. ПҮРЭВ ГАРАГ. № 228 (7725)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.
Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжээрэй.