Төмөрбаатарын БАТСАЙХАН

УИХ-ын чуулганы нэгдсэн хуралдаан баасан гарагт өглөө 09.30 цагт гишүүдийн ирц бүрдсэнээр  хуралдаж эхэлсэн.  Хуралдааны эхэнд  Ерөнхий сайд Г.Занданшатарыг огцруулах УИХ-ын гишүүн П.Сайнзориг нарын саналыг хэлэлцэн шийдвэрлэлээ. УИХ Үндсэн хуульд заасан хугацаанаас 30 минутын өмнө уг асуудлыг хэлэлцэн шийдвэрлэв.

УИХ-ын гишүүн П.Сайнзоригийн Ерөнхий сайд Г.Занданшатарыг огцруулах бланк дээр 50 гаруй гишүүн дэмжиж гарын үсэг зурсан бөгөөд аравдугаар сарын 7-нд УИХ-д өргөн мэдүүлсэн юм. Улмаар УИХ-ын Төрийн байгуулалтын байнгын хорооны хуралдаанаар тус асуудлыг хэлэлцээд гишүүдийн олонх нь Ерөнхий сайд Г.Занданшатарыг огцруулах шаардлагагүй гэж үзсэн. Харин  чуулганы нэгдсэн хуралдаан үргэлжлүүлээд Ерөнхий сайд Г.Занданшатарыг огцруулах саналыг хэлэлцэх байсан ч саналын томьёолол дээрээ санал нэгдэхгүй байсан учраас ирцээ бүрдүүлээгүй юм. Тодруулбал, Ерөнхий сайдыг огцруулах асуудлыг нэгдсэн чуулганаар хэлэлцэхдээ Төрийн байгуулалтын байнгын хорооны санал дүгнэлтээр санал хураана, байнгын хорооны саналаар санал хураахгүй гэсэн хоёр талын эсрэг байр сууриас болж, ирц бүрдүүлээгүй. Зарим нь Үндсэн хуулийн зөрчил болно зэргээр анхааруулж, хуралдаа оролцоогүй. Тэгвэл  24 цагийн дараа ийнхүү чуулганы ирц бүрдэж, УИХ-ын Төрийн байгуулалтын байнгын хорооны санал дүгнэлтийг УИХ-ын гишүүн А.Ариунзаяа танилцуулсан.

Хэлэлцэж байгаа асуудалтай холбоотойгоор гишүүд асуулт асууж, хариулт авч үг хэлж, дууссаны дараа Ерөнхий сайд Г.Занданшатар үг хэлсэн.  Тэрээр “Би хулгайтай эвлэрэх гэж тэмцээгүй. Би хулгайтай хамт унах гэж тэмцээгүй. Харин ард түмэнтэйгээ хөгжил дэвшил өөд хамтдаа босох гэж тэмцсэн. Хулгайтай эвлэрдэг хууль ёс гэж байхгүй. Улсын Ерөнхий сайд би улс орноороо наймаалцахгүй, нүүрсний хулгайч нартай тохиролцохгүй. Эв нэгдэл зөвхөн шударга ёсонд үндэслэн тулгуурлах учиртай. Улсын төсвөө хэлэлцэн батлах, улс орны өмнө тулгамдсан асуудлаа шийдэх урдах ажлаа хийхгүй бол аймаг нийслэл, сум дүүрэг төсвөө баталж чадахгүйд хүрнэ. Эмч, багшийн цалинг нэмэх нь бүү хэл бүх төрийн албан хаагч хөдөлмөрийн хөлсний доод хэмжээгээр өл залгах төдий болох аюулын ирмэг дээр байна. Өнөөдөр уг нь энэ танхимд 47 хоногийн өмнө өргөн барьсан Бортээгийн ордыг эргэлтэд оруулах асуудлыг хэлэлцэх байлаа. Харин энэхүү тогтоолын төсөл Засгийн газрын өмнө босгосон саад тээг болж байна. Гэвч үзэл санаа, зөв зарчим дээрээ байгаа цагт үнэн хэзээд ялна гэдэгт би итгэдэг.

 Өнөөдөр уг нь бид эмч, багш нарын цалин, ахмадуудын тэтгэврийг өсгөж нэмэх талаар ухаан бодлоо уралдуулж байх байлаа. Харамсалтай нь Монгол Улсын Засгийн газрыг зуу гаруйхан хоногийн дараа огцруулах эсэх хэрүүл хийгээд сууж байна. Монгол Улсад тогтвортой хэрүүл бус тогтвортой засаг хэрэгтэй гэлээ.

 Үүний дараа УИХ-ын Төрийн байгуулалтын байнгын хорооны санал буюу Ерөнхий сайд Г.Занданшатарыг огцруулахыг дэмжихгүй гэсэн саналын томьёоллоор санал хураалт явуулсан. Төрийн байгуулалтын байнгын хорооны Монгол Улсын Ерөнхий сайд Г.Занданшатарыг огцруулахыг дэмжээгүй саналыг дэмжье гэснийг нийт гишүүдийн 71 нь татгалзаж санал өглөө. Ингэснээр Монгол Улсын Ерөнхий сайд Г.Занданшатар огцорлоо. Ерөнхий сайд Г.Занданшатар огцорсноор Засгийн газар бүрэн бүрэлдэхүүнээрээ огцрох бөгөөд УИХ дараагийн Ерөнхий сайдыг 30 хоногийн дотор батална. УИХ зургадугаар сарын 17-нд буюу дөрвөн сарын өмнө Г.Занданшатарыг Монгол Улсын Ерөнхий сайдаар томилж байсан юм. Харин ийнхүү дөрвөн сарын дараа УИХ-ын нийт гишүүдийн олонхын саналаар Г.Занданшатарыг огцрууллаа.

 УИХ-ын чуулганы үдээс хойших нэгдсэн хуралдаанаар УИХ-ын дарга Д.Амарбаясгалангийн өөрийн хүсэлтээр үүрэгт ажлаас нь чөлөөлөгдөх хүсэлтийг хэлэлцэн шийдвэрлэв. Чуулганы нэгдсэн хуралдаанд оролцсон 114 гишүүний 102 нь УИХ-ын дарга Д.Амарбаясгаланг үүрэгт ажлаас нь чөлөөлөхийг дэмжлээ.

Д.Амарбаясгалангийн хувьд өөрийнх нь нэр холбогдоод байгаа асуудлаас болж парламентын засаглал доройтож, төрийн ажил гацах ёсгүй, мөн өөрийн нэр төрийг гутаасан асуудлыг цэгцлэх, нэр төрөө сэргээх үүднээс УИХ-ын даргын албан тушаалаасаа чөлөөлөгдөж байна гэж тайлбарласан.

Тэрээр "Нэр бүхий 67 гишүүн намайг ёс зүйн хувьд түдгэлзүүлэх саналыг гаргасан ч хууль зүйн хувьд УИХ-ын дарга албан тушаалаасаа түдгэлзэх заалт байхгүй учраас миний хувьд үүсээд буй асуудал болон гишүүдийн тавьсан асуудлыг харгалзан үзэж УИХ-ын даргын албан тушаалаас чөлөөлөгдөх өргөдлөө өгсөн" гэж тайлбарласан юм.

Түүнчлэн тэрээр "Би гэмт хэрэг хийгээгүй учраас УИХ-ын гишүүнээс түдгэлзэх шаардлага байхгүй" гэж мэдэгдсэн юм.

Ингээд УИХ-ын дараагийн даргыг сонгох хүртэл УИХ-ын дэд дарга Х.Булгантуяа парламентын үйл ажиллагааг удирдана.

 Монгол Улсын улс төрд нэг өдрийн дотор УИХ-ын даргаа чөлөөлж , Ерөнхий сайдаа огцруулсан өдөр болж  түүхэнд үлдэж байна.

Эх сурвалж: “Зууны мэдээ” сонин

2025 ОНЫ АРАВДУГААР САРЫН 20. ДАВАА ГАРАГ. № 197 (7694)

Уншигч Танд “Зууны мэдээ” сонины нийтлэлтэй холбоотой санал, шүүмжлэл, хүсэлт байвал zuuniimedee@gmail.com хаягаар илгээгээрэй.