Т.БАТСАЙХАН

Ерөнхийлөгч У.Хүрэлсүхийн урилгаар Бүгд Найрамдах Узбекистан Улсын Ерөнхийлөгч Шавкат Мирзиёев, гэргий Зиорат Мирзиёевагийн хамт төрийн айлчлал хийхээр манай улсад өчигдөр хүрэлцэн ирлээ. Түүнийг Ерөнхийлөгч У.Хүрэлсүх, гэргий Л.Болорцэцэгийн хамт Д.Сүхбаатарын талбайд угтаж авлаа.

Төрийн хүндэт харуулын захирагч айлтгал өргөсний дараа хөгжимд хоёр улсын Төрийн дуулал эгшиглэв. Ерөнхийлөгч нар Төрийн ёслолын цэргийн цагаан туганд мэхийн ёсолж, Ерөнхийлөгч Ш.Мирзиёев Төрийн хүндэт харуулын цэргүүдтэй мэндчиллээ. Үүний дараа Ерөнхийлөгч нар Их эзэн Чингис хааны хөшөөнд хүндэтгэл үзүүлж, Ерөнхийлөгч Ш.Мирзиёев Төрийн ордны Хүндэт зочны дэвтэрт гарын үсэг зурлаа.

Ерөнхийлөгч Ш.Мирзиёевийн энэ удаагийн төрийн айлчлал нь хоёр улсын хооронд дипломат харилцаа тогтоосноос хойших хугацаанд Бүгд Найрамдах Узбекистан Улсын төрийн тэргүүний түвшинд анх удаа хийж буй дээд түвшний айлчлал юм. Монгол Улс, Бүгд Найрамдах Узбекистан Улс 1992 оны нэг дүгээр сарын 25-ны өдөр дипломат харилцаа тогтоосон юм.

Узбекистан болон Монгол Улс газар зүйн хол байрлалтай хэдий ч улс төр, эдийн засаг, хөрөнгө оруулалтын харилцаандаа тогтвортой ахиц дэвшил гаргасаар байна. 1992 оны нэгдүгээр сард дипломат харилцаа тогтоосноос хойш хоёр улс хамтын ажиллагаагаа тууштай бэхжүүлж, чанарын шинэ түвшинд хүрэх чиглэлд амжилт олж байна. Узбекистан, Монгол Улс хоорондын харилцаа прагматик, харилцан ашигтай зарчимд суурилан тогтвортой хөгжиж байна. Хоёр улс эдийн засгийн харилцан нөхөх чадвар, дипломат нээлттэй байдал, тээвэр логистикийн холболтыг түшиглэн хамтын ажиллагаагаа улам бэхжүүлэхээр зорьж байна. Цаашид хоёр улс үйлдвэрлэлийн сүлжээг өргөжүүлэх, харилцан хөрөнгө оруулалтыг нэмэгдүүлэх, найдвартай худалдааны коридоруудыг хөгжүүлнэ. Ингэснээр энэ харилцаа Евразийн бүс нутгийн бүтцийн чухал бүрэлдэхүүн хэсэг болох боломжтой юм.

Мөн Узбекистан, Монгол Улсын худалдааны эргэлт сүүлийн жилүүдэд эрчимтэй нэмэгдэж байна. 2018–2023 оны хооронд худалдааны эргэлт 8.8 дахин өссөн бөгөөд хамгийн эрчимтэй өсөлт нь 2021–2022 онд тохиожээ. Энэ өсөлт 2024 онд ч үргэлжилж, жилийн дүнгээр 47 хувиар өссөн нь хамтын ажиллагаа бэхжиж байгаагийн илрэл юм. 2025 оны эхний дөрвөн сарын урьдчилсан мэдээллээр худалдааны хэмжээ өмнөх оны мөн үетэй харьцуулахад 11 хувиар өссөн. 2023 онд Узбекистаны экспорт 229 хувиар өссөн бол 2024 онд нийт худалдаа 46.8 хувиар өссөн байна. Узбекистан нь хөдөө аж ахуйн болон үйлдвэрийн бүтээгдэхүүн экспортолдог. Узбекистанд 17 хамтарсан компани үйл ажиллагаа явуулж байгаа бөгөөд 12 нь 100 хувь Монголын хөрөнгө оруулалттай, ихэвчлэн худалдаа болон үйлчилгээний салбарт ажиллаж байна. Хоёр тал логистик, хүнсний боловсруулах үйлдвэрлэл, машин механизмын үйлдвэрлэл зэрэг салбарт хамтын ажиллагаагаа төрөлжүүлэх боломжийг эрэлхийлж байна.

Узбекистан Улсын Ерөнхийлөгчийн түвшинд анх удаа хийж буй энэхүү төрийн айлчлалын үеэр талууд харилцааны эрх зүйн үндсийг бэхжүүлж, уул уурхай, байгаль орчин, боловсрол, шинжлэх ухаан, соёл, эрүүл мэнд, ургамлын хорио цээр зэрэг салбарын хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичигт гарын үсэг зурна. Айлчлалын хүрээнд Монгол – Узбекистаны бизнес форум, “Узбекистанд үйлдвэрлэв” үзэсгэлэн худалдаа, аялал жуулчлалын форум, Узбекистаны уран бүтээлчдийн тоглолт, фото зургийн үзэсгэлэн болон узбек хоолны өдөрлөгийг зохион байгуулж байна.

Эх сурвалж: “Зууны мэдээ” сонин

2025 ОНЫ ЗУРГААДУГААР САРЫН 25. ЛХАГВА ГАРАГ. № 118 (7615)