Б.БЯМБАДУЛАМ

Төрийн ордонд өчигдөр Ерөнхий сайд Л.Оюун-Эрдэнэд итгэл хүлээлгэх эсэх асуудлыг парламент хэлэлцсэн бол Төв талбай жагсаалтай өнжив.  Тухайлбал, өчигдөр хоёр өөр зорилго бүхий жагсаал боллоо. 

“Огцрох амархан” жагсаал 21 дэх өдрөө болов

Талбайн төв хэсэгт Ерөнхий сайд Л.Оюун-Эрдэнийг огцруулах шаардлага бүхий тайван  жагсаал 21 дэх өдрөө үргэлжлэв. Иргэд  үзэл бодлоо илэрхийлж, хамтын дуу хоолойгоо нэгтгэн ийнхүү олон хоног жагсаж байна. Бусад өдрүүдээс ялгаатай нь “UB Comedy”-ийн залуус ирж үзэл бодлоо илэрхийлж жагсаалд нэгдсэн байв. 

Жагсагч Ж.Өнөмөнх:

-Манай жагсаал 21 хоног  үргэлжилж байна.  Сүүлийн зургаан жилийн турш нийгмийн  амьдрал хүнд, иргэдийн сэтгэл санаа бухимдалтай, эрх чөлөөний хувьд хязгаарлагдмал байдал үүссэн.  Мөн Ерөнхий сайд Л.Оюун-Эрдэнийн  орлого зарлагын эргэлзээтэй байдлууд нь иргэдийн дунд бухимдал дагуулж  байгаа. Ерөнхий сайд Л.Оюун-Эрдэнэ өөрөө хамгийн их ёс зүй, хариуцлага ярьдаг улстөрч. Өөрийнх нь ярьдаг ёс зүйг бодитоор нь нэхэх шаардлагыг тавьж бид жагссаар байна. Бид үндсэндээ гурван шаардлага тавиад байгаа. Нэгдүгээрт, Ерөнхий сайд Оюун-Эрдэнийг  огцруулах, хоёрдугаарт, Хамтарсан засгийн газрыг дэмжихгүй, гуравдугаарт, Үндсэн хуулийн нэмэлт өөрчлөлтийг дэмжихгүй гэсэн шаардлагууд тавьсан. Сүүлийн хоёр шаардлага тодорхой хэмжээнд биелээд явж байна. Анхдагч шаардлага биелэх эсэхийг мэдэхгүй байна” гэлээ.  

Барилгын компаниудын төлөөлөл жагсав

“Сэлбэ дэд хорин минутын төсөл”-ийг гүйцэтгэх  тендерийн сонгон шалгаруулалтын хүрээнд Хятадын компаниудыг шалгаруулан авсан нь Монголын барилгын компаниудын хувьд гомдолтой байгаагаа илэрхийлэн эхний өдрөө жагслаа.  Уг жагсаалд  10 гаруй хүн ирсэн байв. Барилгын компанийн төлөөлөл Н.Бат-Эрдэнэ “Тендерийн сонгон шалгаруулалтын үр дүнд Хятадын хоёр компани шалгарсан. Төсвийн хувьд 400 тэрбум бүхий үйл ажиллагаа. Уг нь монгол барилгын компаниуд хийх хангалттай боломжтой байхад хятадуудад өгсөн нь үнэхээр харамсалтай байна.  Ялангуяа үүнийг нийслэлийн Засаг дарга Х.Нямбаатарын зохион байгуулж байгаа гэж харж байна.  Бидний зүгээс эрх баригч нар болон албан тушаалтнуудад мэдэгдэл хүргүүлж дахин шалгаруулах шаардлага тавьж эхний өдрөө жагсаж байна” гэлээ.

Өчигдөр 18.00 цагийн байдлаар жагсаалд оролцогсдын тоо нэмэгдэх хандлагатай байлаа.  Гэсэн ч үзэл бодлоо илэрхийлж байгаа иргэд маш эмх цэгцтэй эгнэн суусан байв.  Жагсагч  А.Анударь “Орой 21.00 цагийн үед /өчигдөр/ Засгийн газрын шийдвэр гарна гэсэн. Огцроосой гэж чин сэтгэлээсээ хүсэж байгаа ч огцрохгүй байх магадлал өндөр байна.  Учир нь намын гишүүд өргөн барьж байгаа төслийг нь хүлээн зөвшөөрч байна гэдэг нь эсэргүүцэх хүчин чадал бага байгаагийн илрэл гэж харж байгаа” гэлээ.

Эх сурвалж: “Зууны мэдээ” сонин

2025 ОНЫ ЗУРГААДУГААР САРЫН 3. МЯГМАР ГАРАГ. № 103 (7600)