Т.БАТСАЙХАН
УИХ-ын чуулганы нэгдсэн хуралдаан өчигдөр 10.00 цагт 57 хувийн ирцтэйгээр эхэллээ. Хуралдаанаар Эрхтэн, эд, эс шилжүүлэн суулгах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж, гишүүд УИХ-ын гишүүн Ж.Чинбүрэнгээс асуулт асууж хариулт авав. Хуулийн төслийн баталснаар цусны донорын үйл ажиллагаа дахь төрийн зохицуулалт, хяналт сайжирч цус сэлбэлт судлалын тусламж үйлчилгээний удирдлагын тогтолцоотой холбоотой харилцаа бүрэн зохицуулагдах боломж бүрдэнэ гэж үзэж байна.
УИХ-ын гишүүн Ж.Чинбүрэн:
-Цусны донорыг бол сурталчлах ёстой. Харин эрхтэн, эс, эд донорыг сурталчлах хориотой. Олон нийтийн сүлжээнд “Мөнгөгүй болчихлоо. Эрхтнээ өгье” гэсэн асуудал гарсан шүү дээ. Тухайн үед албаныхан шалгасан байдаг. Тэгэхээр эрхтний наймаа болгохгүйн тулд сурталчилж болохгүй. Тэр битгий хэл эрхтэн экспортлохгүй. Гадаадад эрхтэн солиулах мэс засал хийлгэхээр явж буй иргэдийн тоог бууруулах чиглэлд хийсэн хамгийн том ажил бол Эрүүл мэндийн даатгалаас тэдний эмчилгээний зардлыг даадаг болсон. Ингэснээр заавал гаднын улсыг зорихгүй эх орондоо энэ төрлийн эмчилгээг хийдэг болсон.
УИХ-ын гишүүн Ж.Баясгалан:
-Маш чухал асуудлыг хэлэлцэж байна. Монгол Улсын хэмжээнд 600 гаруй иргэн эрхтэн шилжүүлэн суулгуулах шаардлагатай дарааллаа хүлээж байгаа юм билээ. Дээрээс нь эрхтэн шилжүүлэн суулгах эмч, мэргэжилтнүүд маш олон цаг хөл дээрээ зогс ажилладаг. Эмч, мэргэжилтнүүдийн нийгмийн баталгааг сайжруулах тал дээр хэрхэн анхаарч байгаа вэ?
УИХ-ын гишүүн Ж.Чинбүрэн:
-Ажилчдын цалин урамшууллын хувьд гүйцэтгэлийн нэмэгдэхийн хэрээр нэмэгдэнэ гэж харж байгаа.
УИХ-ын гишүүн М.Ганхүлэг:
-Монгол Улсад хэчнээн идэвхтэй донор байгаа вэ. Одоогийн зохицуулалтаар доноруудыг хэрхэн урамшуулж байгаа вэ. Хуулийн төсөл батлагдсанаар энэ бүхэн сайжрах уу. Орон нутагт цусны донорын асуудал ямар түвшинд байна вэ.
УИХ-ын гишүүн Ж.Чинбүрэн:
-Анагаах ухааны хурдацтай хөгжил цусны бүтээгдэхүүнээс гарч байгаа бүтээгдэхүүнүүдийн хэрэглээг улам нэмэгдүүлж байна. Мөн халдвар хамгааллыг сайн сахих шаардлагатай. Цусны төв сайн ажиллаж байгаа. Орон нутгийн эмнэлгүүд хүртэл цусаа цуглуулахад хүртэл аюулгүй болсон. Цусны донор бол авлагагүй өглөг, энэ бол хандив. Тиймээс цус өгсний төлөө өгөх төлбөрийн асуудал байхгүй. Алт, мөнгө, хүрэл донор гэдэг урамшууллын тогтолцоо л одоо бий. Монгол Улсын хэмжээнд 170 мянга гаруй цусны донор бүртгэлтэй байдаг. 2025 онд 45577 нэгж цуглуулсан. 35-аас дээш удаа цусаа өгвөл хүднэт донор болно. Ингэснээр автобусаар үнэгүй зорчих, рашаан сувилалд үнэгүй амардаг.
УИХ-ын гишүүн У.Отгонбаяр:
- Цусны донорын тухай хуулийн төсөл болон хамт өргөн мэдүүлсэн хуулийн төслүүдийг хэлэлцэхийг дэмжиж байна. Донорын тухай хууль маш чухал. Нийгэм хурдтай хөгжиж, эд эрхтэн шилжүүлэн суулгах мэс засал эрчимтэй хийгдэж байгаа энэ үед цусны асуудал маш чухал. Доноруудыг алдаршуулах, урамшуулахад онцгой анхаарах ёстой. Тэгж байж хүмүүс цусаа өгнө, мэс заслууд амжилттай хэрэгжих боломж бололцоо бүрдэнэ. П.Батчулуун эмчийн асуудлыг нийгмээрээ л харлаа. Энэ асуудлыг хууль эрхзүйн зохицуулалт байхгүйгээс болсон гэж ойлгож байгаа. Энэ чиглэлийн зохицуулалт энэ хуульд туссан уу.
УИХ-ын гишүүн Ж.Чинбүрэн:
- П.Батчулуун эмчээс өөр гарын үсэг зурах хүн байгаагүй. Албыг удирдаж байсан хүн. Харин ажилчдаа өмгөөлж, өөрөө уучлалт гуйж ажилчдынхаа өмнөөс хариуцлага хүлээсэн.
Хуулийн төсөлтэй холбоотой УИХ-ын гишүүд санал хэлээгүй. Цусны донорын тухай хуулийн төслийг гишүүдийн 52.9 хувийн саналаар дэмжиж хамт өргөн мэдүүлсэн хуулийн төслийн хамт чуулганы нэгдсэн хуралдаанаар хэлэлцүүлэх нь зүйтэй гэж үзсэн.
Эх сурвалж: “Зууны мэдээ” сонин
2025 ОНЫ ТАВДУГААР САРЫН 23. БААСАН ГАРАГ. № 97 (7594)