Б.НЯМСҮРЭН

Ийм дүгнэлтийг шууд бусаар ч болов хийж болох эерэг уур амьсгалтай цөөнгүй үйл явдал өнгөрсөн долоо хоногт өрнөлөө. Энэ талаар АНУ-ын Төрийн нарийн бичгийн дарга М.Рубио дөнгөж өчигдөр “Энх тайвны тухай яриа хэлэлцээнд маш чухал цаг үе ирсэн” хэмээн тодорхойлов.

Товчхондоо бол, шашнаас болж эвдрэлцэх үе ч байхад шашны ачаар эвлэж болдгийн жишээг дэлхий нийтээр Ромын папыг оршуулах ёслолын үеэр тод томруун харав.

Нэгэн насаа Христийн шашны төлөө зориулан эгэлээс эгэл амьдарсан Ромын папын сүүлчийн замд үдэх ёслол хоёр биш хэдэн тийш харчихсан дэлхийн геополитикийн дүр зургийг эерэг уур амьсгалд авчирсан түүхэн үйл явдал болон өрнөж байна.

АНУ-ын ерөнхийлөгч Д.Трамп Цагаан ордоноос “хөөж явуулсан” В.Зеленскийтэй Гэгээн Петрийн сүмд нүүр тулан ярилцлаа. Тэдний уулзалтыг аль аль нь үр дүнтэй хэмээн дүгнэснээс үзэхэд энэ уулзалт сүүлийн хэдэн сарын турш яригдаж байгаа энх тайвны хэлэлцээрийг урагшлуулахад томоохон алхам болох боломжтой.

Шашны тэргүүнийг эцсийн замд үдэх ёслолд олон улсын удирдагчдаас онцгойлон ганцаар гэгээлэг хөх өнгөтэй хослол өмссөн Америкийн ерөнхийлөгчийн хувцаслалт ч түүнийг бусдаас ямар өөр болохыг илэрхийлсэн нэг илэрхийлэл ч гэмээр.

Ямартай ч Ватиканд тэр болгон оршуулах ёслолд оролцогсод дайны талаар хэлэлцээд байдаггүй уулзалт болж дэлхий нийтээр цаашид хэрхэхийг хүлээж сууна. Нэг нь тангараг өргөх ёслолынхоо өдөр “Би энх тайвныг авчрагч болж түүхэнд мөнхөрмөөр байна” гэж легасигаа тодорхойлсон дэлхийн их гүрний удирдагч. Нөгөө нь гурван жилийн турш армийн хувцсаа ч тайлж чадахгүй байгаа жижиг улсын ерөнхийлөгч.

Үргэлжлэлийг zuuniimedee.mn сайтаас цахим сонин захиалан уншаарай.

Эх сурвалж: “Зууны мэдээ” сонин

2025 ОНЫ ДӨРӨВДҮГЭЭР САРЫН 29. МЯГМАР ГАРАГ. № 79 (7576)