Б.БАЯР

Баялгийн санд баялгийг “татах” ажил энэ Засгийн газрын шийрийг шалгаж байна. Ердөө л, Тавантолгойн ордын Ухаахудаг хэсгийг Баялгийн санд авах гэж улс төр буцалж, учир утгагүй бужигнаан тасрахгүй байгаагаас инэгж дүгнэж болно. Гэтэл стратегийн ордуудын талаас илүү нь хувь хүмүүс, хувийн компаниудын мэдэлд оччихсон. Энэ нь, Баялгийн сантай холбоотой асуудал цаашид улам хүндрэхийг харуулж байгаа юм.

Гэхдээ “...Засгийн газар энэ зорилгоосоо ухрахгүй” гэдэг байр суурьтай байгааг сүүлийн хуралдаан, зарим сайдынх нь мэдээллээс харж болохоор байна.

Өнгөрсөн долоо хоногт нийтэд хандаж мэдээлэл хийсэн ХЗДХ-ийн сайд О.Алтангэрэл “…Засгийн газар Ухаа худгийн ордтой холбоотой асуудлыг хэлэлцээд 54 хонож байна. УИХ-д албан тоотоор хүргүүлж, тогтоолын төсөл өргөн бариад 31 хонож байна. Одоо би 32, 33, 34 хоног гээд зарлаад явъя. Ажлын хэсгийн ахлагчийн хувьд энэ асуудлыг чуулганаар хэлэлцэхийг хүлээж байна. Яагаад энэ асуудлыг УИХ хэлэлцэхгүй байна вэ. Хууль зөрчиж, гэмт хэргийн шинжтэй байж болзошгүй зүйл байна гэдэг ажлын хэсгийн дүгнэлт гарсан. Дүгнэлтээ УИХ-ын гишүүдэд танилцуулж, ард түмэнд юу болоод байгааг харуулмаар байна. Монголын ард түмний хүртэх ёстой баялгийн талаарх асуудал ярьж байхад цаг зуурын улс төр, чимээ шуугианд саатмааргүй байна” гэсэн юм.

Мөн Ерөнхий сайд Л.Оюун-Эрдэнэ Засгийн газрын хуралдаан дээр “…Ухаахудагийг ч, Төгрөн нуурын ордыг ч, бусад ордоо ч шийдвэрлэ. Баялгийн сангийн хууль хэрэгжиж эхлэх нь хамгаас чухал. Эрх ашиг нь хөндөгдөж байгаа хэсгийн хуурмаг мэдээллийн хөшигт авталгүйгээр үндсэн ажилдаа төвлөр” гэж танхимынхаа сайд нарт хэлжээ. Эндээс үзвэл, дээр хэлсэнчлэн сайд нар “...Цаг зуурын улс төр, чимээ шуугиан, хуурмаг мэдээллийн хөшигт автахгүй байя” гэж тохирсон бололтой.

Түүнчлэн “…Н.Учрал сайд Засгийн газрын хуралдаан дээр Төгрөг нуурын орд газартай холбоотой материалуудыг танилцуулсан. Дээрх үйл баримт хэрэв үнэн бол мөнгө угаахтай холбоотой гэмт хэрэг байж болзошгүй талаар ч яригдсан. Үүнийг нягталж шалгах үүрэг хаана байдаг вэ гэхээр хууль хяналтын байгууллагад л байгаа. Миний ойлгосноор, Н.Учрал сайд материалуудаа АТГ-т шилжүүлсэн. Тэнд холбогдох шалгалтын ажиллагаа хийгдэх байх. Нөгөө талаас, ард түмэн өөрсдөө Үндсэн хуульд заасны дагуу баялаг авах ёстой гэсэн зарчим чиг шугам дээрээ хатуу, ухрахгүй байгаа” гэв.

Эх сурвалж: “Зууны мэдээ” сонин

2025 ОНЫ ДӨРӨВДҮГЭЭР САРЫН 21. ДАВАА ГАРАГ. № 73 (7570)