Б.БАЯР

“…Трампын тариф” гэдэг хоёрхон үгтэй нэр томъёо 2025 он гараад дэлхийг сандаргаад эхэлсэн. Энэ сүүлдээ зарим улс орны хувьд сандралыг нь айдас болгон хувиргаж байна. Хэрэглэдэг бүхнээ импортолдог, хэдхэн ашигт малтмалын бүтээгдэхүүн экспортолдог манай улс ч Трампын тарифад ширвүүлж эхлээд байгаа юм. 

Америк, Хятад хоёрын бие биедээ тавьсан татварын өндөр тарифууд уржигдраас хэрэгжээд эхэлсэн. Тодруулбал, Америкийн зүгээс Хятадад 104 хувийн татвар тавьсан юм. “…Тэд тарифын асуудлаар хэн хэн нь буулт хийхгүй байсаар худалдааны дайны хурцадмал байдлыг үүсгэлээ” гэж дэлхий нийтээрээ дүгнэж байна. 

Энэ манай улсад ч хамаатай. “…Америкийн Хятадад тавьсан 104 хувийн татварын тариф хэрэгжиж эхэлснээр  Монгол Улсын эдийн засгийн гадаад талд ямар өөрчлөлт бий болох вэ” гэдэг чухал юм. Уг тарифаас болоод Хятадын экспорт буурна. Дагаад коксжих нүүрсний хэрэглээ нь бууна. Тэгэхээр манай эдийн засгийн гол мөнгийг “олж ирдэг” нүүрсний экспорт маань буурах магадлал өндөр байгаа юм. Ер нь бол, ийм бодит эрсдэл бий болсныг хаа сайгүй яриад эхэлсэн. Мэдрээд ч эхэллээ. Оргүйгээс охинтой гэдэг шиг амжиж гэрээлсэн Гашуунсухайтын төсөл л амь зуух орлого болж мэдэхээр л байна. Дашрамд, энэ төслийн бүтээн байгуулалтын нээлт 2025 оны тавдугаар сарын 14-нд болох тов гарчээ.
Тэгвэл, Трампын тарифын хэрэгжилттэй холбоотой асуудлыг Аюулгүйн зөвлөлийн уржигдрын шуурхай хуралдаанаар хэлэлцжээ.   Өөрөөр хэлбэл, төрийн дээд түвшинд “…Трампын тарифад тогтож үлдэх арга чарга юу байна вэ” гэдгийг анхаараад эхэлжээ. Энэ хүрээнд Засгийн газар уржигдрын хуралдаанаараа хэлэлцсэн “…Трампын тарифаас үүдэж гарах эрсдэлээс хамгаалах 10 багц санал”-аа Аюулгүйн зөвлөлд танилцуулжээ. Мөн хийн хоолой зэрэг эдийн засгийн томоохон төсөл хөтөлбөрүүдийн явцыг хариуцсан сайд нар, Үндэсний хорооныхноос сонссон байна. 

Эх сурвалж: "Зууны мэдээ" сонин

2025 ОНЫ ДӨРӨВДҮГЭЭР САРЫН 11. БААСАН ГАРАГ. № 67 (7564)