Т.САЙХАН
Баянгол дүүрэгт гэр бүлийн зургаан хүн угаартаж нас барсан харамсалтай хэрэг гарсан. ЦЕГ-аас иргэдийн хувийн мэдээллийг тараагүй гэдгээ мэдэгдэж, тухайн мэдээллийг тараасан эх сурвалжийг олж тогтоон шалгана гэдгээ ХЗДХ-ийн сайд О.Алтангэрэл мэдээлсэн.
Тэгвэл угаартаж нас барсан иргэдийн болон гэр бүлийнх нь талаарх хувийн мэдээлэл яамдын мэргэжилтнүүдийн мэдээлэл солилцдог групп чатаас задарсан болох нь тогтоогджээ. Энэхүү мэдээллийг олон нийтэд дэлгэсэн байж болзошгүй иргэн Б болон холбогдох дөрвөн хүнд хэрэг үүсгэн шалгаж эхэлсэн байна.
Энэ талаар ХЗДХ-ийн сайд О.Алтангэрэл "Нийслэлийн агаарын бохирдлыг бууруулах шуурхай штаб ажиллаж байгаа. Энэ штабын хүрээнд Байгаль орчин уур амьсгалын өөрчлөлтийн яам, Хууль зүйн дотоод хэргийн яам, Эрчим хүчний яам зэрэг холбогдох газруудаа бүрдсэн хэсэг Ажлын хэсэг байгуулан ажиллаж байгаа. Энэ Ажлын хэсэгт нийслэлийн зохих мэргэжилтнүүд нь ажиллаж байна. Эдгээр мэргэжилтнүүдэд дундаа мэдээлэл солилцдог групп бий. Энэ групп дээр цаашид юуг анхаарах уу, ямар хэмжээний хохирол учрав, утааны нөхцөл байдалтай холбоотой асуудал зэрэг шуурхай мэдээлэл солилцдог вайбер групп байсан. Энэ групп дээр байгууллагуудын тавьсан мэдээллийг олж авч угаартаж нас барсан гэр бүлийн мэдээллийг бэлтгэсэн гэдгийг урьдчилсан байдлаар тогтоосон. Тухайлбал, үзлэг шалгалт хийсэн, утаа мэдрэгч суулгуулсан зэрэг мэдээллийг цагдаагийн байгууллагаас авсан бол бусад мэдээллийг групп чатаас бэлдэж олон нийтэд цацсан байна. Энэхүү хэрэгт холбогдуулан иргэн Б болон бусад дөрвөн хүнд хэрэг үүсгэн шалгаж эхэлсэн. Шалгагдаж байгаа хүний хувьд ямар нэгэн төрийн албаны харьяалалгүй байсан.
Монгол Улсад гэм бурууг зөвхөн шүүх тогтоодог учраас одоо бол гэм буруугийн талаар ярих боломжгүй юм. Ямартай ч мөрдөн шалгах ажиллагаа явуулж, урьдчилан тогтоогдсон нөхцөл байдлын хүрээнд эрүүгийн хэрэг үүсгэж холбогдох этгээдүүдийг шалгаж байна" гэлээ.
Эх сурвалж:www.polit.mn