П.ЖАРГАЛ

АНУ-д жил бүр зохион байгуулагддаг ААU (Amateur Athletic Union) сагсан бөмбөгийн тэмцээнд оролцох хүсэлтэй эрэгтэй тамирчдыг энэ сарын 14-ний өдөр сонгон шалгаруулна. Тус ажлыг “Старс академи-Монгол авьяас академи” зохион байгуулж байгаа бөгөөд 15, 16, 17, 18-19 гэсэн дөрвөн насны ангилалд тус бүрд нэг баг бүрдүүлж, нийт 40 хүүхдийг сонгох юм. Шалгаруулалтыг “Үй Цай” сургуульд өглөөний есөн цагаас насны ангиллаар “NBA combine”-ийн дасгалаар авна.

AAU (Amateur Athletic Union) нь 1888 онд байгуулагдсан, АНУ-ын хамгийн том спорт холбооны нэг билээ. Залуучуудын спорт хөгжлийг дэмжих, ур чадвараа дээшлүүлэх, өрсөлдөх боломжийг олгох зорилготой. AAU хөтөлбөрт тэнцсэн тамирчдын төлбөрийг гэр бүл, асран хамгаалагчид бүрэн хариуцах юм. Харин МТА-аас хүүхдийн байр, хоол, бэлтгэл, тэмцээн болон АНУ-д аялахад шаардлагатай хэрэгцээгээр хангаж, хариуцан ажиллана. AAU нь тавдугаар сарын 1-31-ний хооронд АНУ-ын хэд хэдэн мужид зохиогдох аж. Энэ үеэр Америкийн их сургуулийн скаутуудын анхааралд өртөж, тэтгэлэг авах, ирээдүйдээ хөрөнгө оруулах боломж нээлттэй юм. AAU хөтөлбөрт тэнцсэн хүүхдүүд дөрвөн сарын сүүл хүртэл Монголдоо бэлтгэл хийх бөгөөд ур чадвараа сайжруулах, бие бялдраа хөгжүүлэхэд анхаарна гэв. Энэ үйл ажиллагаа нь ашгийн төлөө бус харин Ш.Энхийн-Од, Г.Дөлгөөн, С.Ган-Эрдэнэ нарыг залгамжилж, АНУ-ын сагсан бөмбөгийн ертөнцөд хөл тамирчдын тавих гүүр болж байгаа юм. Тиймээс санхүүгийн боломжгүй авьяаслаг, ур чадвартай хүүхдүүдэд хөрөнгө оруулах, нийгмийн хариуцлагын хүрээнд дэмжлэг туслалцаа үзүүлэх компани, аж ахуй нэгжүүдийг уриалж байгаагаа зохион байгуулагчид мэдэгдлээ.

Эх сурвалж: www.polit.mn