Б.ЖАВХЛАН

Байгаль орчны төрийн бус байгууллагууд, эрдэмтэн судлаачид УИХ, Үндэсний аюулгүй байдлын зөвлөлд шаардлага хүргүүлж байгаа талаар өчигдөр мэдээлэл хийлээ.  Амьтан судлаач Доктор Д.Өсөхжаргал" Хамтарсан Засгийн газар 2024-2028 оны үйл ажиллагааны хөтөлбөртөө Говийн Их дархан цаазат газарт байх Нарансэвстэйн боомтыг сэргээнэ, нээнэ гэсэн нь Монгол Улсын нэгдэн орсон олон улсын хэд хэдэн гэрээ конвенциуд, хүчин төгөлдөр мөрдөгдөж байгаа хууль тогтоомжуудыг зөрчиж байна. Мөн олон улсын өмнө гэрээгээр хүлээсэн үүргээ шударгаар сахин биелүүлэх талаар заасан Үндсэн хуулийн зарчим ч алдагдаж байна. Говийн Их Дархан Цаазат Газар анх 1975 онд байгуулагдсан бөгөөд газар нутгийн хэмжээгээрээ дэлхийд дээгүүрт ордог улсын тусгай хамгаалалттай газрын нэг. Уг газар нь А, Б гэсэн хоёр хэсгээс бүрддэг бөгөөд Нарансэвстэйн боомт нь А хэсэгт байрладаг. Энэхүү хэсэг нь Монгол Улсын Улаан ном, амьтны тухай хууль, Засгийн газрын тогтоолоор нэн ховор, ховор амьтны жагсаалт, Зэрлэг амьтан ургамлын аймгийн ховордсон зүйлийг олон улсын хэмжээнд худалдаалах тухай конвенц, Зэрлэг амьтдын нүүдэллэдэг зүйлийг хамгаалах конвенц зэрэгт бүртгэгдсэн 37 зүйл ховор, ховордсон амьтад бүхий амьтны аймгийн хувьд Монгол төдийгүй дэлхийн хэмжээнд асар ач холбогдолтой бүс нутаг. Энэ эко систем бүхий газар дэлхийн хаана ч байдаггүй зөвхөн Монгол Улсад л байдаг. Гэтэл энэ газарт боомт нээвэл өргөн уудам нутагт шилжин нүүдэллэн амьдардаг амьтад төдийгүй нэн ховор ургамал, шавж, шувууд, говьд цөөн байх уст цэг сүйдэж говийн эмзэг хөрс, экосистем аюулд орох эрсдэлтэй.  Өмнө нь энэ боомтыг 1993 онд нээгээд ердөө дөрвөн удаа ажиллуулаад байгаль орчин, говийн экосистемд асар хор нөлөөтэй учраас хааж байсан. Хэрэв Нарансэвстэйн боомтыг ашиглалтад оруулах юм бол маш олон хууль, актыг зөрчиж, ховор эко системийг бүрэн устгана гэж ойлгох хэрэгтэй" гэв.

Эх сурвалж: www.polit.mn