Т.САЙХАН

Шадар сайд Т.Доржханд эрчим хүчний реформыг эсэргүүцэгчдийг мэтгэлцээнд урьжээ.  Тэрээр энэ тухайгаа “Өнөөдөр бүгд Улаанбаатар хотод төвлөрөөд байна. Яагаад гэвэл Улаанбаатар хотод амьдрахад хямд, орон нутагт амьдрахад үнэтэй байна. Мөн нийслэлийн гэр хороололд нүүрсээ түлж байгаа хүмүүс байшинд амьдардаг иргэдээс 4-5 дахин их зардал гаргаад байна. Хамтарсан Засгийн газар энийгээ шударга болгоё, зах зээлийнх нь зарчимд шилжүүлье, гэр хороололд байгаа олон өрхийг орон сууцанд хамруулъя гэдэг хөтөлбөр зоригтой гаргаад явж байгаа. Ийм юм ярихаар “Ард түмний орлого бага байна, эхлээд та нар эрчим хүчээ шийдчихээд дараа нь үнэ тарифын асуудлаа шийд” гэдэг популзим хийж байгаа хүмүүс их байна. 40 жилийн хугацаанд та нар ингэж ярьсаар байгаад нэг ширхэг үйлдвэр шийдсэн юм уу. өнөөдөр яг юу шийдсэн юм.  Юу ч байхгүй шүү дээ. Эрчим хүчний салбар монополь болоод үр ашиггүй явсаар унасан. Монгол Улс бол эрчим хүчний хамгийн их нөөцтэй. мөртлөө ямар нэг шалтгаанаас болоод төслийг нь унагаагаад байдаг, эсэргүүцдэг, ард түмэндээ хайртай гэдэг дүр гаргаж ирдэг. Ард түмэндээ хайртай нэрийн дор энэ реформыг эсэргүүцээд байгаа хүмүүс хүрч ирж надтай мэтгэлц. Ямар шийдэл байгаа юм, яаж энэ асуудлыг шийдэх гээд байгаа юм. Засгийн газрын хувьд хамтарсан , популизмыг сөрөөд өнөөдөр жаахан гашуун ч гэсэн урт хугацаандаа хэрэгтэй том шийдвэрүүдийг гаргана,  гаргахын төлөө явна. Үндэсний хороог ахалж байгаа хүний хувьд энэ реформыг амжилттай хийнэ. Яагаад вэ гэвэл бүх нөхцөл нь бүрдчихсэн. Маш олон хөрөнгө оруулагч эрчим хүчний салбарт хөрөнгө оруулалт хийе гээд хүлээж байна. Урт хугацаандаа үнэ уначих юм байна, эрчим хүчний хувьд бие даасан тусгаар улс байж чадах юм байна гэдэг итгэл үнэмшил байна. Реформ гэдэг бол зөвхөн үнэ өөрчлөх асуудал биш. Реформ гэдэг бол дутагдалтай байгаа, гацчихаад байгаа эдийн засгийг яаж тэлэх юм.Эрчим хүчний асар их нөөцтэй хэрнээ өөрсдийнхөө ч хэрэгцээг ч хангаж чадахгүй. Ийм хөгийн байдалтай байгааг зогсоох ёстой. Монгол Улс дунд, урт хугацаандаа эрчим хүчийг экспортолно.Эрчим хүчний асуудлаа шийдэхгүй бол агаарын бохирдлоо шийдэж чадахгүй, орон сууц барьж чадахгүй, цалин тэтгэврийг нэмэгдүүлж чадахгүй” гэж мэдэгдээд байна.

Эх сурвалж: www.polit.mn