Б.ГАРЬД

Энэ жилийн ээлжит хоёр сонгууль шувтарлаа. Одоо 2027 оны Ерөнхийлөгчийн сонгуулийн тухай яригдаж эхэллээ. Тус сонгууль оролцогч олонтой болно. УИХ-д суудалтай таван нам эвслээс нэр дэвшүүлнэ. Таван өрсөлдөгчтэй гэсэн үг.

Энд нэг зүйлийг тодруулахад, Үндсэн хуульд 2019 онд хийсэн өөрчлөлт дахин өөрчлөгдвөл МАН-аас одоогийн Ерөнхийлөгч У.Хүрэлсүх, АН-аас өмнөх Ерөнхийлөгч Х.Баттулга нар нэр дэвших магадлалтай тухай яриа хөөрөө улс төрийн хүрээнд гараад удаж байна. Тухайн үед Үндсэн хуулийн 30.2-т “…Ерөнхийлөгчөөр тавин нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно” гэсэн заалт нэмж оруулсан. Үүгээр Х.Баттулга 2021 оны сонгуульд нэр дэвшиж чадаагүй юм. Харин одоо “…Үндсэн хуулийн Цэц Үндсэн хуулийн өөрчлөлтийг хянах эрхтэй болж, түүнийхээ дараа дээрх өөрчлөлтийг хийх нь” гэсэн мэдээлэл сүүлийн үед байнга яригдаж байна.

Гэхдээ яг одоогийн хуулиар өмнөх болон одоогийн Ерөнхийлөгчийг оролцуулахгүйгээр УИХ-д суудалтай намууд хангалттай горилогчтой болоод байгаа юм. Эднээс МАН, АН горилогч олонтой байна.

МАН-ын дараагийн Ерөнхийлөгчид нэр дэвшигч болохоор ЕТГ-ын дарга Г.Занданшатар, МАН-ын Нарийн бичгийн дарга Д.Сумьяабазар, ХХААХҮ-ийн сайд Ж.Энхбаяр, Гадаад харилцааны сайд Б.Батцэцэг, УИХ-ын ХЗБХ-ны дарга Д.Цогтбаатар нарын нэр түлхүү яригдаж байна. Харин АН-аас Тэргүүн Шадар сайд Лу.Гантөмөр, УИХ-ын дэд дарга Б.Пүрэвдорж, УИХ-ын гишүүн Н.Алтанхуяг, Х.Тэмүүжин, С.Ганбаатар нар санаатай байгаа аж.

Мөн ХҮН намаас Шадар сайд Т.Доржханд, “Датаком” Д.Энхбат, “Дефакто” Д.Жаргалсайхан нарын хэн нэг нь нэр дэвшиж магадгүй байна. Түүнчлэн “Үндэсний эвсэл”-ээс өөрөө л хүсвэл нэр дэвших ганцхан хүн бий. Тэр нь МАК компанийн Бодлогын зөвлөлийн дарга Б.Нямтайшир юм. ИЗНН-ын тухайд УИХ-ын гишүүн Б.Батбаатар нэр дэвших боломжтой. Гэхдээ УИХ-ын гишүүн С.Оюун “…Ерөнхийлөгчид нэр дэвших магадлал өндөр” гэж дуулдаж байна.

Ер нь бол Ерөнхийлөгчид горилогч эдгээр улстөрчдийн дийлэнх нь сүүлийн үед сүрхий идэвхижжээ. Наанаа, одоогийн эрхэлж буй албан тушаалынхаа дагуу ажиллаад байгаа мэт боловч цаанаа 2027 оны Ерөнхийлөгчийн сонгуульд зориулсан үйл ажиллагаа явуулаад эхэлсэн байна. Тэд Олон улсын томоохон арга хэмжээг Монголдоо зохион байгуулж, яамаа хотоос нүүлгэж, 2027 оны сонгуулийн өмнөхөн биеллээ олж батлагдах популист маягийн хууль санаачилж, олны эрх ашгийг хамгаалсан томоохон сэдэв барьж авах зэргээр нэр хүндээ өсгөх ажилд ханцуй шамлан оржээ. Зарим нь эхэлсэн байна. Үлдсэн нь удахгүй эхлэх аж.

Эх сурвалж: “Зууны мэдээ” сонин

2024 ОНЫ АРАВДУГААР САРЫН 25. БААСАН ГАРАГ. № 207 (7451)