Т.САЙХАН

Засгийн газрын ээлжит хуралдаанаас гаргасан шийдвэрийг Боловсролын сайд П.Наранбаяр танилцууллаа.  Тэрээр   "Энэ хичээлийн жил гурван улиралтай болсон. Нийслэлд ханиад томуу их, хамгийн хүйтэн үед таван долоо хоног амарна. Харин хөдөө орон нутагт хавар урт амарна. Нэгдүгээр улирал урт болох учраас аравдугаар сарын сүүлээр, хавар бие даалтын долоо хоног оруулсан. Мөн цахим хичээлийн долоо хоног хоёр удаа болно. Бие даалтын долоо хоногт музей үзэх, зургаан настай хүүхдүүдийг нүд, шүд, зүрхний иж бүрэн эрүүл мэндийн үзлэгт хамруулах ажлыг хийнэ. Түүний зэрэгцээ гамшгийн сургалт орохоор холбогдох байгууллагатай ярилцаж байна. Энэ хичээлийн жил сургуулийн өмнөх болон бага боловсролын түвшинд үндэсний сургалтын хөтөлбөрийн туршилтыг эхлүүлнэ. Боловсролын хуулийн шинэчлэлийн хүрээнд англи хэл үндсэн гадаад хэл болсон. Үүнтэй холбоотойгоор англи хэлний “Person” хөтөлбөрийг гурав, дөрөвдүгээр ангид шинээр оруулна.   Мөн хичээлийн шинэ жилийн нээлт ням гарагт тохиож байгаа. Ням гарагт цэцэрлэг, ЕБС, насан туршин суралцахуйн төвүүд, багш суралцагч, эцэг эх, асран хамгаалагчдад хүндрэл чирэгдэлгүй, нүсэр бус байдлаар зохион байгуулна. Төрийн гурван өндөрлөгөөс эхлээд сайд миний бие ч олон сургууль, цэцэрлэг дотроос аль нэгийг нь онилж очихгүй. Мэндчилгээ л дэвшүүлнэ. Хичээлийн шинэ жилийн баяр бол цэвэр эцэг эх, багш, суралцагчдын баяр байх ёстой учраас  дарга нар очиж хүндрэл чирэгдэл учруулахгүй байх чиглэлийг Ерөнхий сайд өгсөн" гэлээ.

Эх сурвалж:www.polit.mn