Т.САЙХАН

Идлэг шонхор шувууны нүүдэл Өвөрхангай аймгийн Тарагт суманд төвлөрч байгаатай холбогдуулан гадаад улсын иргэд олноор ирж шувуудыг барьж байгаа талаарх дуудлага мэдээлэл цагдаагийн байгууллагад бүртгэгдсэн байна. 

Уг асуудлын талаар ЦЕГ-ын дэд дарга, цагдаагийн хурандаа Н.Мөнхзул мэдээлэл өглөө. 

Тэрээр "Өчигдрийн шууд бичлэгтэй холбоотойгоор манай байгууллагын дотоод хяналт шалгалтын хэлтсээс шуурхай шалгах ажиллагааг явуулахад цагдаагийн алба хаагч авлигал, хээл хахууль авсантай холбоотой асуудал тогтоогдоогүй.   Тодруулбал тухайн нөхцөл байдлын үед дээр дурдсан Land cruiser 200 автомашиныг тухайн нутаг дэвсгэрээс зөөвөрлөхөд гарсан ачигч машины зардлыг замын цагдаагийн зохицуулагч тухайн Land cruiser 200 автомашины эзэмшигчдээс гаргуулахтай холбоотой үйлдэл болсон юм байна.  Тухайн гадаадын иргэний хувьд тухайн ачигч машины үйлчилгээний төлбөрийг төлөхтэй холбоотой мөнгө барьж явсан нөхцөл байдал дээр цагдаагийн алба хаагчийг авлигал авсан гэх ташаа мэдээллийг нийтэд түгээсэн нөхцөл байдал тогтоогдсон.  Иргэдийн хувьд тухайн албан хаагчийг авлигал авсан гэх хардлага байвал тухайн албан хаагчийг Авлигатай Тэмцэх Газарт шалгуулах эрх нь нээлттэй байгаа. Цагдаагийн байгууллагын хувьд цагдаагийн алба хаагчийн сахилга, ёс зүй, хууль зөрчсөн үйлдэлтэй холбоотой нөхцөл байдал тогтоогдох юм бол үүн дээр хатуу хариуцлага тооцуулах хууль ёсны дагуу арга хэмжээ авах байр суурьтай байгаа. Нөгөө талаас цагдаагийн алба хаагч гүтгэгдэх, ташаа мэдээлэлд өртөх, аюулгүй байдалд нь халдах нөхцөл үүсэх юм бол цагдаагийн байгууллагаас хууль ёсны ашиг сонирхлыг хамгаалах, сэргээх хууль, дүрэм журамтай гэдгийг ойлгох хэрэгтэй" гэв. 

Эх сурвалж:www.polit.mn