Т.САЙХАН

Дэлхийн алдарт дуучин Пласидо Доминго манай улсад хүрэлцэн иржээ.  Түүний тухай мэдээллийг онцлон хүргэж байна.

 Түүний бүтэн нэр нь Хосе Пласидо Доминго Эмбиль.  Тэрээр 1941 оны нэгдүгээр сарын 21-нд Испанийн Мадрид хотод төржээ.  Аав  Пласидо Доминго, ээж Пепита Эмбил нар Испани хөгжимт драмын төрлийн одууд байв.

1949 онд найман настайдаа Доминго бүлийнхээ хамт Мексик рүү нүүж, эцэг эх нь өөрсдийн театрын багийг байгуулжээ. 13 жилийн турш Мексикийн нийслэл түүний гэр болжээ. Мехико хотод Пласидо 14 настайдаа Үндэсний консерваторид хөгжмийн чиглэлээр суралцаж хөгжмийн удирдаач, төгөлдөр хуураар хичээллэсэн байна.

Тэрээр ийнхүү дэлхийд Испанийн дуурийн дуучин бөгөөд хөгжмийн удирдаач, драмын тенор хэмээн алдаршсан билээ.  

Хагас зуун жилийн турш дэлхийн тайзан дээр Доминго 150 гаруй дуурийн гол дүрийг бүтээсэн нь бусад дуурийн дуучдаас илүү үзүүлэлт юм.  Мөн 3900 гаруй тоглолтод оролцсон байна.

Тэгвэл дэлхийн алдарт гурван тенорын нэг, дуурийн дуучин, удирдаач, Грэммийн 12 шагналын эзэн Пласидо Доминго өчигдөр Монголд ирлээ. Тэрээр  наймдугаар сарын 3-ны өдөр зохион байгуулах сонгодог урлагийн тоглолтод оролцох хүндэт зочдын нэг юм. Ардын жүжигчин, дэлхийн шилдэг баритон дуучин Э.Амартүвшин дэлхийн сонгодог урлагийн домог Пласидо Доминго тэргүүтэй дэлхийн шилдгүүдтэй хамтран Монголд анх удаа тоглолт хийх мэдээ олны анхаарлыг татаж буй.

Тоглолтын талаар алдарт дуучин Пласидо Доминго хэлэхдээ “Дуурийн урлагт хүчин зүтгэсэн 65 жилийн хугацаанд анх удаа Монголд тоглох гэж буй тул урилгыг хүндэтгэн хүлээж авсан. Ялангуяа тэртээ 2012 онд Пласидо Домингогийн нэрэмжит олон улсын дуурийн дуучдын уралдаанд тэргүүн байр эзэлж байсан Э.Амартүвшин дуучин маань ер бусын онцгой авьяастай уран бүтээлч төдийгүй түүний хоолойн техник, ур чадварыг нэгэн тайзнаа мэдэрнэ гэдэгтээ туйлын их баяртай байна” хэмээсэн юм. 

Эх сурвалж:www.polit.mn