С.УЯНГА

УИХ-ын сонгуулийн 11 дүгээр тойрог Сонгинохайрхан дүүрэгт нэр дэвшигч Э.Батшугар болон “Хөгжлийн тав” багийнхан иргэд, сонгогчидтой уулзаж санал шийдэл, мөрийн хөтөлбөрөө танилцуулсаар явна. МАН-аас Сонгинохайрхан дүүрэгт УИХ-ын гишүүн, Инновац цахим бодлогын байнгын хорооны дарга Э.Батшугар, Соёлын сайд Ч.Номин, Нийслэлийн Засаг даргын орлогч П.Сайнзориг, тус дүүргийн Засаг дарга Н.Алтаншагай, анагаах ухааны доктор, профессор Н.Хүрэлбаатар нар нэр дэвшиж буй юм.

Нэр дэвшигчид энэ өдрүүдэд залуучуудын төлөөлөл болон дүүргийнхээ хороодод ажиллаж иргэд сонгогчдын санал бодлыг сонсож байна. Иргэдийн хувьд өргөн хэрэглээний бараа бүтээгдэхүүний  үнийн өсөлтийг хамгийн ихээр хөндөж асуулаа. Энэ талаар дүүрэгт УИХ-ын гишүүн, Инновац цахим бодлогын байнгын хорооны дарга Э.Батшугар “Үнийн өсөлт тэр дундаа хүнсний бүтээгдэхүүний үнэ нэмэгдэж буйд онцгой анхаарах ёстой. Тээвэр логистикийн болон гадаад үнийн өсөлт цар тахлын үеэс харьцангуй буурсан. Тиймээс манай улсын хувьд үнийн өсөлтийн гол хүчин зүйл нь хүнсниий бүтээгдэхүүнтэй холбоотой. Үүнийг шийдэх гарц нь Засгийн газар болон хувийн хэвшлийнхэн хамтран ажиллаж нийлүүлэлтийг хэрхэн зохицуулах вэ гэдэгт онцгой анхаарах ёстой. Ялангуяа, орон нутагт бүсчилсэн ХАБ-үүд байгуулж, зуншлага сайтай газраас мал мах худалдан авч бусад газар руугаа түгээх балансыг зөв зохицуулах хэрэгтэй” гэв.

Мөн МАН-ын мөрийн хөтөлбөрт тусгасан орон сууцжуулах хөтөлбөрийн талаар танилцуулж сонирхсон асуултад хариуллаа. Тодруулбал, цаашид нийгмийн даатгал төлөгч иргэн бүр орон сууцтай болох боломжийг бүрдүүлнэ. Үүний тулд тэтгэврийн нөөц санг мөнгөжүүлэх юм. Ингэхдээ нийгмийн даатгалын тогтолцооны шинэчлэлийг үргэлжлүүлж, тэтгэвэр, тэтгэмжийг үнийн өсөлттэй уялдуулан жил бүр нэмэгдүүлэх бодлогыг хэрэгжүүлж, хагас хуримтлалын тогтолцоонд шилжсэнээр тэтгэврээ өвлүүлэх, урьдчилан ашиглах бодлого баримтлахаар мөрийн хөтөлбөрт тусгаад байгаа. Энэ бүх шинэчлэлийг хийхэд иргэн бүрийн оролцоо чухал гэдгийг “Хөгжлийн тав” багийн гишүүд хэллээ.

Сонгинохайрхан дүүргийн иргэн Х.Тунгалаг “Манай дүүрэгт өндөр боловсролтой, өргөн мэдлэгтэй залуус нэр дэвшиж байгаад таатай байна. Өнгөрсөн дөрвөн жил “Хурдан” цэг, И Монголиа гээд иргэдийн амьдралд бодит биеллээ олсон чухал ажлууд хийсэн. Цахим шилжилтийг илүү хурдлуулаасай гэж хүсэж байна. Мөн хамгийн гол нь банкны зээлийн хүүг бууруулбал бидний нуруун дээр том ачаа хөнгөрнө. Амьдрал огт өөр болно” гэлээ.

Эх сурвалж: “Зууны мэдээ” сонин

2024 ОНЫ ЗУРГААДУГААР САРЫН 25. МЯГМАР ГАРАГ. № 125 (7369)