Т.САЙХАН

Ерөнхийлөгч У.Хүрэлсүх Бүгд Найрамдах Узбекистан Улсын Ерөнхийлөгч Шавкат Мирзиёев-ийн урилгаар 2024 оны зургадугаар сарын 
23-26-ны өдөр тус улсад төрийн айлчлал хийхээр товлосон. Өнөөдөр /06.23/ Ерөнхийлөгч У.Хүрэлсүх Узбекистан улсад хийх айлчлалаа албан ёсоор эхлүүлж байна.Энэ айлчлал нь хоёр улсын хооронд  1992 онд дипломат харилцаа тогтоосноос хойш дээд түвшинд болж байгаа анхны айлчлал гэдгээр онцлог.

Ерөнхийлөгч У.Хүрэлсүх, гэргий Л.Болорцэцэг нарыг Бүгд Найрамдах Узбекистан улсад төрийн айлчлал хийхээр ирэхэд Монгол Улсаас тус улсад суугаа онц бөгөөд Бүрэн эрхт Элчин сайд Д.Батбаатар, БНУУ-ын Ерөнхий сайд А.Арипов, Гадаад хэргийн сайд Б.Саидов, Ташкент хотын дарга Ш.Умурзаков, БНУУ-аас Монгол Улсад суугаа Онц бөгөөд Бүрэн эрхт Элчин сайд Ф.Арзиев болон Элчин сайдын яамны дипломат ажилтнууд угтлаа. Угтах ёслолын дараа Ерөнхийлөгч У.Хүрэлсүх, гэргий Л.Болорцэцэг нар Шинэ Узбекистан цэцэрлэгт хүрээлэнд очиж, "Тусгаар тогтнолын хөшөө"-нд цэцэг өргөж хүндэтгэл үзүүлэв.

Айлчлалын үеэр Монгол Улсын Ерөнхийлөгч У.Хүрэлсүх Бүгд Найрамдах Узбекистан Улсын Ерөнхийлөгч Ш.Мирзиёев-тэй албан ёсны хэлэлцээ хийх юм. Мөн Олий Мажлис (Парламент)-ийн Сенатын дарга Танзила Нарбаева, Ерөнхий сайд Абдулла Арипов нартай уулзаж, харилцаа, хамтын ажиллагааг өргөжүүлэн хөгжүүлэх, бүс нутаг, олон улсын тавцан дахь хамтын ажиллагааны өргөн хүрээний асуудлаар санал солилцоно.

Эх сурвалж:www.polit.mn