МАН-ын дарга, Ерөнхий сайд Л.Оюун-Эрдэнэ өчигдөр Дорнод, Баян-Өлгий, Сүхбаатар аймагт ажиллав.  Дорнод аймагт ажиллах үеэрээ Хөгжлийн бэрхшээлтэй хүний хөгжлийн төвийн нээлтэд оролцлоо. Засгийн газар, Азийн хөгжлийн банкны санхүүжилтээр Хөгжлийн бэрхшээлтэй хүний хөгжлийн төвийн барилгыг зургаан аймагт барьж буйгаас Дархан-Уул, Дундговь, Хөвсгөл, Ховд аймгийн төвүүдийг өнгөрсөн намар ашиглалтад оруулсан. Дорнод аймаг дахь “Хөгжлийн бэрхшээлтэй хүний хөгжлийг дэмжих төв тав дахь нь юм. Энэ үеэр Ерөнхий сайд Л.Оюун-Эрдэнэ “Ардчилал бол иргэн бүхэнд тэгш хандах, хуулийн өмнө иргэн бүхэн тэгш эрхтэй байх хамтын үнэт зүйл. Иргэн бүхэн нийгмийн хөгжилд тэгш оролцох, нийгмийн эерэг хандлага бий болгох, хөгжлийн бэрхшээлтэй иргэдэд ээлтэй эрхзүйн орчин, стандартыг бүрдүүлэх, нийгмийн тэгш оролцоог хангах нь чухал” гэв.Мөн Үндсэн хуульд өөрчлөлт оруулж, тогтолцооны өөрчлөлт хийснээр энэ удаагийн УИХ-ын ээлжит сонгуулиар намуудын жагсаалтад хөгжлийн бэрхшээлтэй иргэд багтаж, Монгол Улсын парламентад анх удаа хөгжлийн бэрхшээлтэй иргэдийн төлөөлөл орж ирэх боломж бүрдээд буйг тодотголоо. Ерөнхий сайд Л.Оюун-Эрдэнэ өнгөрсөн оны есдүгээр сард орон нутагт ажиллахдаа Ховд аймаг дахь Хөгжлийн бэрхшээлтэй хүний хөгжлийн төвийн нээлтэд оролцох үеэрээ Монгол Улсын Ерөнхий сайд, МАН-ын даргын хувиар 2024 оны УИХ-ын сонгуульд нэр дэвшүүлэх жагсаалтын эхний тавд хөгжлийн бэрхшээлтэй иргэдийн төлөөллийг багтаахаа мэдэгдэж улс төрийн бусад намуудыг ч уриалж байсан юм. Тэрээр энэ амлалтдаа хүрч МАН-ын жагсаалтад нэр дэвшигчдийн дөрөвдүгээрт хөгжлийн бэрхшээлтэй иргэдийн төлөөлөл болгож “Ахиллис Монгол”  төрийн бус байгууллагыг үүсгэн байгуулагч, АШУҮИС-ийн НЭМС-ийн багш О.Саранчулууныг оруулаад буй.

МАН-ын дарга, Ерөнхий сайд Л.Оюун-Эрдэнэ Баян-Өлгий аймгийн Өлгий хотноо иргэд, сонгогчидтой уулзлаа. Тэрээр 2024 оны УИХ-ын сонгуулийн онцлогийг товч танилцуулаад  энэ удаагийн сонгууль “Ард түмэн ялах уу? Авлигачид ялах уу” гэдгийг шийдэх чухал сонгууль. Мөн  С.Зоригийн мөрөөдсөн, манай ахмадуудын итгэсэн Ардчилсан хувьсгалын үзэл санааг бүдгэрүүлж, иргэдийн урмыг хугалж, итгэлийг эвдсэн зүйл бол авлига юм гэдгийг онцлов.

Эх сурвалж: “Зууны мэдээ” сонин

2024 ОНЫ ЗУРГАДУГААР САРЫН 13. ПҮРЭВ ГАРАГ. № 117 (7361)