Т.САЙХАН

ХЭҮК-оос 2024 оны ээлжит сонгууль болохтой холбогдуулан гарч болзошгүй хүний эрхийн зөрчлийн асуудлаар хэвлэлийн хурал зохион байгууллаа. Энэ үеэр авлига, албан тушаалын гэмт хэрэгт холбогдож, шүүхээр гэм буруутай нь тогтоогдсон гэх үндэслэлээр сонгуульд нэр дэвшүүлэхээс татгалзуулаад буй "Үндэсний эвсэл"-ийн тэргүүн Н.Номтойбаярын асуудлын талаар ХЭҮК-ын референт Б.Болорзул мэдээлэл өглөө. 

Тэрээр "Сонгуулийн Ерөнхий Хороо нийт 154 хүнийг долоон төрлийн үндэслэлээр нэр дэвшигчээр бүртгэхээс татгалзсан. Зургаадугаар сарын 2-ны байдлаар 104 хүн нь зөрчлөө арилгуулахаар СЕХ-д материалаа өгсөн байна. Авлига, албан тушаалын гэмт хэрэг үйлдсэн нь шүүхээр тогтоогдсон гэх үндэслэлээр "Үндэсний эвсэл"-ийн тэргүүн Н.Номтойбаярыг нэр дэвшүүлэхээс татгалзсан тохиолдол гарсан.

Бид СЕХ, цагдаагийн байгууллагаас гаргасан тогтоол, лавлагаанд дүн шинжилгээ хийсэн. Авлига, албан тушаалын гэмт хэрэг нь Н.Номтойбаяр гэх нэр дэвшигчийн зүйлчлэгдсэн гэмт хэргийн зүйл ангид хамаарах эсэх асуудал яригдаж байгаа. 

Дээд Шүүх хууль тайлбарлах бүрэн эрхийнхээ хүрээнд энэ асуудлаар тайлбар хийгээгүй байгаа. Тиймээс цагдаагийн байгууллагаас гаргасан асуудал зөв буруу гэдгийг шүүх боломжгүй.  Гэхдээ цагдаагийн байгууллагын гаргасан баримт бичигт дүн шинжилгээ хийхэд зөрүүтэй мэдээлэл гаргасан тохиолдол байна. 

Цагдаагийн байгууллага Сонгуулийн тухай хууль тогтоомжид заасны дагуу шүүхээр гэм буруутай нь тогтоогдсон эсэхэд лавлагаа өгөх бүрэн эрхтэй. Н.Номтойбаярын сонгогдох эрх хангагдахгүй байгаа бол сонгогдох эрхийн зөрчил гарсан байж болзошгүй гэж үзэж байгаа. 

Бид СЕХ-той хамтран ажиллах төлөвлөгөө баталж, хэрэгжүүлж ажиллаж байгаа. Одоогийн байдлаар Н.Номтойбаярын асуудлаар албан бичиг хүргүүлээгүй. Удирдлагын түвшинд СЕХ-ны даргатай уулзахаар төлөвлөсөн" гэв. 

Эх сурвалж:www.polit.mn