Т.САЙХАН
“Зууны мэдээ” сонин зургаадугаар сарын “Үзэл бодлын чөлөөт талбар" буландаа Үндэсний баялгийн сангийн тухай хуулийн үзэл баримтлалаар мэргэжлийн экспертүүд болон иргэдийн байр суурийг хүргэх гэж байна. Монголчууд баялагтаа эзэн болох ёстой гэсэн үндсэн үзэл баримтлалын хүрээнд Засгийн газраас Үндэсний баялгийн сангийн тухай хуулийг өргөн барьж, парламент яаралтай горимоор баталснаар хууль хэрэгжиж эхэлсэн. Улмаар баялгийн дансаа нээж, эхний төвлөрүүлсэн хөрөнгийг ипотекийн зээлийн санхүүжилтэд зарцуулахаар шийдвэрлэсэн билээ. Тэгвэл энэ хуулийн үзэл санааг иргэд болон мэргэжлийн экспертүүд хэрхэн харж байна вэ, монголчууд баялагтаа эзэн болж чадах уу сэдвээр 30 иргэний байр суурийг энэ сарын 5-нд буюу ирэх лхагва гарагийн дугаартаа нийтлэн хүргэнэ. Ингэхдээ “Зууны мэдээ” сонины нийтлэлийн бодлогод тогтсон журмын дагуу олон талын төлөөллийг оролцуулна. Мөн жендерийн хувьд тэгш оролцоотой байх зарчмыг баримтална. “Зууны мэдээ” сонин 2024 оны анхны "Үзэл бодлын чөлөөт талбар" буландаа Монгол Улсын 33 Мөнх-Эрдэнийг онцлон тэдний байр суурийг хүргэж байсан. Харин хоёрдугаар сард Цагаан сар өв уламжлалтай холбоотой сэдвээр, гуравдугаар сард Бүсчилсэн хөгжлийн бодлогын талаар гадаадад суугаа монголчууд, дөрөвдүгээр сард нийслэлийн бүсчилсэн хөгжлийг онцолсон. Харин тавдугаар сард МҮОНРТ үндэсний язгуур эрх ашиг, өв уламжлалыг сурталчлан таниулж чадаж байна уу сэдвээр та бүхэндээ “Үзэл бодлын чөлөөт талбар” булангаа хүргэж байсан бол энэ удаа монголчууд баялагтаа эзэн болж чадах уу сэдвээр үргэлжлэх гэж байна.
Эх сурвалж:www.polit.mn