Ц.БАЯР

Ардчилсан намын дэргэдэх Хүний эрхийн хороо буюу хүний эрхийг хамгаалах байгууллагаас Д.Ганбаяр тэргүүтэй төлөөлөл АН-д шаардлага бусад нам эвслүүдэд уриалга хүргүүлж “Зууны мэдээ” сонины “Үндэсний мэдээллийн төв”-д өнөөдөр хэвлэлийн бага хурал хийлээ.  Хурлаар тэд биднийг төлөөлж сонгогдсон УИХ-ын гишүүд, УИХ-аас байгуулагдсан Засгийн газар нь улс төрийн намын хувийн ашиг сонирхолд тулгуурлан шийдвэр гаргаж байгаа нь Монгол Улсын иргэдийг төлөөлөх ардчиллын зөрчим алдагдаж төр нь өөрөө Хүний эрхийг зөрчиж буй үндсэн шалтгаан болж байна гэж мэдэгдлээ. Иймд улс төрийн намууд УИХ-ын сонгуульд өрсөлдөхдөө Үндсэн хууль, Сонгуулийн тухай хуулиа мөрдөж сонгогчдын саналыг авахын тулд хууль зөрчихгүй, бусдын нэр хүндэд халдахгүй, мөнгө тараахгүй шударга өрсөлдөхийг уриаллаа. Мөн нам, эвслүүд нэр дэвшигчийг гишүүд дэмжигчдийнхээ өмнө нээлттэй, ил тод, шударгаар сонгон дэвшүүлэхийн зэрэгцээ нэр дэвшигч бүртэй  хариуцлагын гэрээ байгуулахыг уриалав. Түүнчлэн авлига, албан тушаалын гэмт хэрэгт холбогдож байгаагүй нэр цэвэр нийтийн эрх ашгийн төлөө шийдвэр гаргаж чадах мэдлэг боловсролтой, ёс зүйн зарчимтай, хүний эрхийн хамгаалагчийг нэр дэвшүүлэхийг Ардчилсан намаас шаардаж бусад нам,эвслүүдэд уриалав. Энэ үеэр Д.Ганбаяр хэлэхдээ “ Төрд ажиллаж үзээгүй хүмүүсийг намын жагсаалтаар УИХ-д сонговол бид л хохирно. Намын багийн тоглолтоор хэлэх үгээ заалгасан, мэдлэг чадваргүй хүмүүсийг сонгомооргүй байна. Ямар нэг гэмт хэрэгт холбогдсон хүмүүсийг дэвшүүлэхгүй байхыг АН-аас шаардаж байна. Мөн ЖДҮ, Хөгжлийн банк, нүүрсний хулгайд холбогдсон хүмүүсийг УИХ-д нэр дэвшүүлэхийг эсэргүүцэж байна. Хүний эрхийн түгээмэл тунхаглал, Иргэний болон улс төрийн факт, Эрүүдэн шүүлтийн эсрэг Олон улсын факт зэргийг зөрчсөн эрх бүхий өндөр албан тушаалтнуудад  Монгол Улсын Үндсэн хуулиар хариуцлага хүлээлгэх тухай тусгаагүй нь харамсалтай. Хүний эрх, эрх чөлөөг хангаж байж тухайн улс орон хөгждөг. Гэтэл өнөөдөр хүний эрхийг дээдлэх байтугай нэр дэвшигчийг фракцын хэмжээнд  ярьж шийдвэрлэж байгааг АН анхаарах хэрэгтэй. АН нэр дэвшигчээ тодруулахдаа ил, тод сонгон шалгаруул. УИХ-д нэр дэвшихгүй хүмүүс нь нэр дэвшигчдээ тодруулъя” гэсэн юм.

Эх сурвалж: www.polit.mn