Иргэдийн улс төрийн эрх, эрх чөлөөг хангаж, хамгаалах, сонгуулийн боловсрол мэдлэгийг дээшлүүлэх зорилгоор “Зууны мэдээ” сонин Сонгуулийн ерөнхий хороотой хамтран “Сонгуулийн боловсрол” буланг хөтлөн явуулдаг билээ.

Монгол Улсын Үндсэн хуульд оруулсан нэмэлт өөрчлөлтийн дагуу Улсын Их Хурлын 126 гишүүнийг бид анх удаа сонгох гэж байна.

Монгол Улсын Улсын Их Хурлын 78 гишүүнийг олныг төлөөлөх /мажоритар/ аргаар сонгох буюу Сонгогч Та тухайн тойрогт ногдох мандатын тоогоор сонголт хийнэ. Тодруулбал, тойрог бүрээр мандатын тоо зэрэгцэж байх юм.

Харин Улсын Их Хурлын 48 гишүүнийг хувь тэнцүүлэн төлөөлөх /пропорционал/ аргаар буюу сонгогч Та зөвхөн нэг нам, эвслийг сонгоно.

Улсын Их Хурлын гишүүнийг сонгох энэхүү хоёр аргатай холбоотойгоор Үндсэн хууль, Монгол Улсын Их Хурлын сонгуулийн тухай хуульд заасны дагуу Саналын хуудас нь хоёр хэсэгтэй байна. Тодруулбал, сонгогч Танд хоёр хуудас өгнө.

Улсын Их Хурлын 78 гишүүнийг сонгох хэсэгт Та өөрийн сонгохыг хүссэн нэр дэвшигчийн өмнөх зууван улаан дугуйг дүүргэн будаж, саналаа тэмдэглэнэ. Ингэхдээ тухайн тойргийн мандатын тооноос илүү эсхүл дутуу тоогоор тэмдэглэвэл Таны санал хүчингүйд тооцогдохыг анхаарна уу.

Харин Улсын Их Хурлын 48 гишүүнийг сонгох хэсэгт Та өөрийн сонгохыг хүссэн 1 нам, эвслийн нэрийн өмнөх зууван дугуйг дүүргэн будаж саналаа тэмдэглэнэ. 1-ээс илүү нам, эвсэлд санал тэмдэглэсэн бол Таны саналын хуудас хүчингүйд тооцогдохыг анхаарна уу.

Эх сурвалж: “Зууны мэдээ” сонин

2024 ОНЫ ТАВДУГААР САРЫН 14. МЯГМАР ГАРАГ. № 96 (7340)