Т.САЙХАН

УИХ-ын гишүүн асан Ж.Батзандан ШИНЭН-аас гарч, АН-д нэгдэж буйгаа мэдэгдсэн. Үүнтэй холбогдуулан ШИНЭН-аас мэдээлэл хийлээ. ШИНЭН-ын дарга Ц.Гантулга “Өнгөрсөн хоёр хоногийн хугацаанд АН-ын зүгээс ШИНЭН өөрийн намтай нэгдсэн мэтээр мэдээлэл тараасан. Тиймээс ШИНЭН анх яаж байгуулагдсан талаар мэдээлэл өгөх зүйтэй гэж үзлээ. Анх 2019 оны есдүгээр сарын 16-нд ШИНЭ нам байгуулагдсан. ШИНЭН 113 төрийн бус байгууллага, мэргэжлийн холбоод хамтран Монголыг МАНАН дэглэмээс аврах, шинэ нийгмийн байгуулах эрхэм зорилготойгоор анх байгуулагдсан. Тухайн үеийн УИХ-ын гишүүн Ж.Батзандан, Л.Болд нар 1,200 төлөөлөгчтэйгөөр анхны хурлаа хийсэн. Анх 801 хүн гарын үсэг зурснаар байгуулагдсан байсан нам одоо 24 мянган гишүүнээ үнэмлэхжүүлсэн, 50 гаруй мянган дэмжигчтэй, өдөр тутмын үйл ажиллагаагаа академик түвшинд явуулж байгаа улс төрийн хүчин болоод байна.

Энэ намын анхны дарга Ж.Батзандан АН-д орж буйгаа мэдэгдсэн. Тэр бол хувь хүний сонголт. Цөөн хэдэн хүн улс төрийн өөр нам, хүчинтэй хамтрах боломжтой гэж хэлснээр 24 мянган гишүүн болон олон зуун мянган дэмжигчийн итгэлийн өөрчилнө гэж байхгүй.

МАНАН-гийн эсрэг гэчхээд буцаад МАНАН-тай нэгдэж байгаа хүмүүстэй бид агаар хуваалцах боломжгүй. Бид хувь хүнтэй асуудлыг буруушаахгүй. Харин нийгэмд болохгүй байгаа зүйлийг засахын төлөө сэхээтнүүд, улс төрийн нам, хүчний төлөөллүүдтэй хамтарч үйл ажиллагаагаа явуулж байгаа.

ШИНЭН-ын даргын хувиар хэлэхэд ганц хоёрхон хүн биднийг төлөөлөхгүй. ШИНЭ нам бүтэн, цул хэвээрээ байгаа учраас 2024 оны сонгуульд амжилт гаргана гэж үзэж байгаа.Манай намаас гарсан гэгдэж байгаа хүмүүс өнөөдрийн байдлаар өргөдлөө өгөөгүй байна” гэлээ.

Мөн ШИНЭН-ын гишүүн Д.Жаргалсайхан “Ж.Батзандан үзэл санаа, итгэл үнэмшлээсээ урваж, анд нөхдөөсөө урваж байна. Ийм хүн ард түмний төлөө ажиллаж чадахгүй. Өдөр бүр хэдэн зуун залуу бидний үзэл санааг дэмждэгээ илэрхийлсээр байгаа” гэв.   

Эх сурвалж:www.polit.mn