Т.САЙХАН
Төр нийгмийн зүтгэлтэн, С.Зориг агсны гэргий Б.Булганы хэвлэлд өгсөн анхны томоохон хэмжээний ярилцлагыг өөрийнх нь болон хөтлөгч Ч.Содбилэгийн зөвшөөрөлтэйгөөр "Зууны мэдээ" сонин нийтэлсэн. Б.Булган тус ярилцлагадаа Хотын дарга асан Э.Бат-Үүлийн тухай "Би их жаахнаас нь, залуухнаас нь мэднэ. Энэ хүн 1990 оноос хойш 30 жил хоёрхон юм ярьсан. Оросыг муулдаг, хөшөөтэй байлддаг. Тэгээд баатар болсон. Одоо идсэн уусан юмтайгаа тайван амьдар л даа. Тэрийг чинь хураая гээгүй ш дээ. Өг гээгүй ш дээ. Араа бодсон дээр гэж хэлмээр байна би энэ хүмүүст. Үр хүүхдээ бодоцгоо гэмээр байна. 30 жил авлаа ш дээ. Одоо болоо ш дээ. Насаараа идэх юмаа идлээ. Үр хүүхэд нь тэрийг нь авч хадгалж арвижуулж чадах хэмжээнд байгаа юу гэсэн байр суурь илэрхийсэн юм.
Тэгвэл үүний дараа Хотын дарга асан Э.Бат-Үүл хариу тайлбар хийжээ. Тэрээр "Л.Оюун-Эрдэнэ, Х.Баттулга, Б.Булган нар аа, С.Зоригийн нэрээр ардчиллыг булшлах гэж байгаа бол санааны чинь гарз шүү. С.Зоригийн үзэл санаа үйл хэргийг мэддэг нөхөр нь би амьд байна шүү. С.Зориг өнөөдөр амьд байсан бол В.Путины Оросыг буруушааж, Ардчилсан Оросын төлөө байх байсныг би мэднэ. Би С.Зоригийн хөшөөг босголцож, Лениний хөшөөг буулгасан хүн нь шүү. Б.Булган өөрийгөө С.Зоригийн залгамжлагчаар Х.Баттулгыг тодруулах орчин цагийн Янжмаа, Крупская болчихсон мэт дэмийрч байгаа бол эндүүрэл шүү. Б.Булган өөрөө гүтгүүлэхийн зовлонг үзчихээд, гүтгэлгээр хорслоо тайлж байгаа бол бурхан чинь өршөөхгүй шүү" гэв.
Эх сурвалж:www.polit.mn