Т.САЙХАН
Ардчилсан намын "Гранд Монгол" нэгдэлд "Ардчилсан хүчний холбоо" нэгдэж байгаа талаар өнөөдөр /04.19/ мэдээлэл хийлээ.
Ардчилсан намын тэргүүн дэд дарга С.Баярцогт "Ардчилсан нам дотроо олон бүлэг, фракцтай. Анхнаасаа ардчиллын төлөө нэгдсэн таван намын нэгдэл дээр суурилсан нам байсан. Ардчилсан намын үнэт зүйлийг тээж, хүний эрх, эрх чөлөөг дээдэлж, парламентат ёсыг баталгаажуулах, төрийн аль болох жижиг байлгаж, ардчиллын үнэт зүйлийг хамгаалах зорилгоор нам доторх гурван клуб нийлж, "Гранд Монгол" нэгдлийг байгуулсан. Өнөөдөр энэ нэгдэлд Ардчилсан хүчний холбоо нэгдэж байна. Бид хамтын ажиллагааны гэрээнд гарын үсэг зурж байна" гэлээ.
Ардчилсан намын дарга асан С.Эрдэнэ "Өнөөдөр Ардчилсан намын түүхэнд чухал үйл явдал болж байна. Ардчилсан нам анхнаасаа олон ургальч үзэл дээр олон үзэл санааны нэгдэл болж ирсэн нам. Бүрэн бус тоогоороо Ардчилсан нам 20-иод намын нэгдлийг 30 жилийн хугацаанд бий болгосон. Баруун төвийн үзэл санаа, хувь хүний эрх, эрх чөлөө, хувийн өмчийг хамгаалах суурь үзэлд нэгдсэн байдаг. УИХ-ын сонгуулийн хариуцлагатай цаг үед бүлгүүд нэгдэж, байр сууриа нэгтгэж байна" гэлээ.
Эх сурвалж:www.polit.mn