Н.Жаргалмаа

Сингапур улсын ерөнхий сайд Ли Сиен Лун ирэх сарын 15-нд албан тушаалаасаа огцрохоор болсон талаар түүний ажлын албанаас мэдээллээ. Тэрээр ерөнхий сайдын албыг 20 орчим жил хашиж буй нэгэн юм. Сингапурын дараагийн ерөнхий сайдаар сангийн сайд Лоуренс Вонг томилогдоод байна. Ийнхүү тэрээр тус улсын түүхэн дөрөв дэх ерөнхий сайд болж байна.

Өдгөө 72 настай Ли Сиен Лун нь Сингапурын үндэслэгч Ли Куан Югийн хүү бөгөөд 2004 оноос хойш ерөнхий сайдын албын хашиж байна. Тэрээр Ковид-19 цар тахлын нөхцөл байдлаас үүдэн 70 нас хүрэхээсээ өмнө албан тушаалаа хүлээлгэн өгөх бодолтой байжээ. Шинэ томиглогдсон ерөнхий сайдын тухайд тэрээр өөрийн “X” сүлжээний албан ёсны хуудаснаа “Лоуренс болон түүний багийнханд бүх талаар дэмжлэг үзүүлж, Сингапурын гэрэлт ирээдүйн төлөө хамтран ажиллаасай” хэмээн сингапурчуудаас хүссэн байна. Харин 51 настай Лоуренс Вонгийн хувьд тэрээр өөрийгөө хэзээ ч ерөнхий сайдын албан тушаалд томилогдон гэж бодож байгаагүй гэжээ. Түүнчлэн видео мэдэгдэлдээ “Би энэхүү хариуцлагыг гүнээ ухамсарлаж ерөнхий сайдын үүргийг даруухнаар биелүүлэх болно” гэв.

Дөрөв дэх ерөнхий сайд Лоуренс Вонг Сингапур улс дотоод болон гадаад олон шинэ сорилтуудтай тулгарч буй цаг үед төрийн эрхийг авч байна. Тодруулбал АНУ-БНХАУ-ын өрсөлдөөнөөс үүдэлтэй макро эдийн засгийн асуудал, Тайванийн хоолойн хямрал буюу бүс нутгийн нөхцөл байдал болон дотооддоо өсөж буй амьдралын өртөг, орон сууцны үнийн өсөлтүүд зэрэг асуудлууд багтаж байна.

Сингапур 2025 оны арван нэгдүгээр сард сонгууль явуулах ёстой ч энэ оны есдүгээр сард сонгууль явуулах төлөвтэй байгаа юм.

Эх сурвалж: www.polit.mn